Медыцынскім арганізацыям дазволена абслугоўваць сваю медтэхніку ў шэрагу дзяржпрадпрыемстваў на бесканкурэнтнай аснове

11 красавіка, Позірк. Медыцынскім арганізацыям дазволена абслугоўваць сваю медтэхніку ў шэрагу дзяржаўных прадпрыемстваў на бесканкурэнтнай аснове, вынікае з пастановы Савета міністраў № 206 ад 10 красавіка.

Палажэнні дакумента, апублікаванага 11 красавіка на Нацыянальным прававым інтэрнэт-партале, тычацца “арганізацый аховы здароўя, дзяржаўных устаноў адукацыі, якія ажыццяўляюць падрыхтоўку, падвышэнне кваліфікацыі і (або) перападрыхтоўку спецыялістаў з вышэйшай або сярэдняй спецыяльнай медыцынскай, фармацэўтычнай адукацыяй”.

Гэтыя арганізацыі, паводле рашэння ўрада, “маюць права ажыццяўляць дзяржаўныя закупкі работ (паслуг) па тэхнічным абслугоўванні і рамонце медыцынскай тэхнікі і сістэм медыцынскага газазабеспячэння ў рэспубліканскага унітарнага прадпрыемства “Медтэхнацэнтр” і (або) даччыных прадпрыемстваў вытворча-гандлёвага рэспубліканскага унітарнага прадпрыемства “Белмедтэхніка” з прымяненнем працэдуры закупкі з адной крыніцы”.

Пастанова будзе дзейнічаць на працягу двух гадоў.

25 сакавіка Савет міністраў падоўжыў на 2025–2026 гады бесканкурэнтныя ўмовы продажу прадукцыі для прадпрыемстваў “Лакафарба” (Ліда, Гродзенская вобласць) і “Белшына” (Бабруйск, Магілёўская вобласць), якія знаходзяцца пад заходнімі санкцыямі.