Тэрабарона каля мяжы з Літвой вучыцца змагацца з беспілотнікамі
11 красавіка, Позірк. Вучэнні тэрытарыяльных войск па абароне аднаго з умацаваных раёнаў, што створаны ў Беларусі, праходзяць у Пастаўскім раёне Віцебскай вобласці (мяжуе з Літвой. — “Позірк”.), паведамляе Міністэрства абароны.
Паводле слоў начальніка Генеральнага штаба Паўла Муравейкі, прадугледжваецца “стварэнне падобных вузлоў супраціву, якія павінны забяспечыць устойлівасць абароны і гарантаваць абарону тэрыторыі”.
Стварэнне ўмацаваных раёнаў, на яго думку, актуальнае, таму што гэта дэманструе гатоўнасць Беларусі да абароны, а не да нападу: “Усе тыя інсінуацыі, якія сёння вельмі маштабна прапагандуюцца ў інтэрнэце пра тое, што мы гатовыя напасці на суседнія краіны, — гэта не што іншае, як проста прапаганда”.
“Мы адпрацоўваем сучасныя дзеянні. Прычым у гэтых раёнах працуюць як вайскоўцы <…>, так і падраздзяленні тэрытарыяльных войск, народнае апалчэнне. Гэта комплексныя рэчы, якія павінны навучыць нашых грамадзян абараняць сваю зямлю. Такія ўмацаваныя раёны ў нас створаны фактычна ва ўсіх абласцях, і да іх абароны, да іх задзейнічання будуць прыцягвацца ўсе падраздзяленні тэрытарыяльных войск”, — патлумачыў Муравейка.
Ён падкрэсліў магчымасць укараняць “дасягненні, якія падгледзелі ў рамках сучасных ваенных канфліктаў, няхай гэта будзе спецыяльная ваенная аперацыя РФ (так у Маскве і Мінску называюць вайну Расіі супраць Украіны, — “Позірк”.) або баявыя дзеянні ў іншых краінах”: “Гэтыя ноу-хау — па барацьбе з беспілотнікамі, абароне ад беспілотнікаў, па ажыццяўленні манеўру і па стварэнні адпаведных месцаў дыслакацыі і размяшчэння вайскоўцаў — намі ўкаранёны і актыўна выкарыстоўваюцца ў вузлах супраціву ўмацаваных раёнаў. Больш за тое, нашы падраздзяленні тэрытарыяльных войск актыўна асвойваюць прыёмы і спосабы дзеянняў у гэтых раёнах, каб атрымаць навыкі для абароны сваёй краіны”.
Раней адзначалася, што гэтыя манеўры пройдуць 11–13 красавіка. Паводле інфармацыі Міністэрства абароны, іх мэта — удасканаленне “навыкаў службовых асоб у кіраванні падначаленымі сіламі” тэрытарыяльнай абароны, “навучанне асабовага складу выкананню сваіх абавязкаў на штатных пасадах пры вырашэнні задач” тэрабароны, ацэнка “гатоўнасці падраздзяленняў тэрытарыяльных войск да вырашэння пастаўленых перад імі задач”.
Вучэнні праходзяць у межах праверачных збораў тэрытарыяльных войск Пастаўскага раёна (11 сакавіка — 15 красавіка).
9 красавіка дзяржаўны сакратар Савета бяспекі Аляксандр Вальфовіч, наведваючы раён правядзення гэтых збораў, назваў тэрабарону “адным з найважнейшых напрамкаў” у плане павышэння абараназдольнасці Беларусі.
Трэці месяц запар улады правяраюць баявую гатоўнасць арміі. Першая праверка боегатоўнасці была абвешчана 3 лютага. Фактычна без дакладнага завяршэння першай распачалася другая — 24 сакавіка.
Тэрытарыяльныя войскі — род войск Узброеных Сіл, які склікаецца ў перыяд вайны або напружанай ваенна-палітычнай сітуацыі. Выконвае дапаможныя функцыі. Складаецца з асоб, што прайшлі службу і знаходзяцца ў запасе.
Разам з тым міністр абароны Віктар Хрэнін на сустрэчы з кіраўніцтвам выканкамаў — Мінскага гарадскога і абласных, а таксама з ваеннымі камісарамі са сталіцы і рэгіёнаў 26 мая 2023 года ў Гомелі заявіў, што тэрытарыяльная абарона “з забяспечвальнай сістэмы трансфармуецца ў паўнавартасную баявую”.
Рэжым Аляксандра Лукашэнкі бесперапынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны.