Лукашэнка адпрэчыў патрабаванні Польшчы для нармалізацыі стасункаў, зноў папракнуў яе ў адмове ад Пачобута і згадаў пра Мельнікаву
Польскі плот на мяжы з Беларуссю
12 красавіка, Позірк. Аляксандр Лукашэнка фактычна адпрэчыў патрабаванні, якія Польшча выставіла Беларусі для пачатку патэнцыйнага працэсу нармалізацыі стасункаў.
“Зразумела, Пачобут гэты — вечная праблема (гаворка пра асуджанага ў Беларусі з палітычных матываў журналіста і актывіста неафіцыйнага Саюза палякаў Анджэя Пачобута. — “Позірк“.), — цытуе прэс-служба спікера, які выказаўся з гэтай нагоды 12 красавіка на суботніку ў Мінску. — І нейкая яшчэ тэма. “Для таго каб размаўляць з намі, беларусы павінны зрабіць гэта”. Я кажу: “Ды пашліце вы іх”. Мы нікому нічога не вінныя. Хочаце — сядаем ды размаўляем”.
Прадстаўнікі польскіх уладаў раней неаднаразова агучвалі патрабаванні, выкананне якіх Мінскам абавязковае на шляху да нармалізацыі стасункаў: спыненне міграцыйнага крызісу на мяжы, вызваленне зняволеных палякаў, у прыватнасці Пачабута, а таксама выдача нелегала, якога Варшава лічыць вінаватым у смерці польскага салдата Матэвуша Сітэка.
Беларусь, заявіў Лукашэнка на суботніку, “у свой час хацела выдаць” Польшчы Пачобута, аднак тая, паўтарыў ён у чарговы раз, нібыта “адмовілася”: “А Пачобут сказаў: “Я туды не паеду”. У нас гэта ўсё запісана. І ўсе нас папракаюць, што мы прыціскаем некага. Нікога мы не прыціскаем. Месца ўсім хапае”.
Паводле сцвярджэння спікера, Анжаліка Борыс — кіраўніца згаданага саюза, якая правяла год пад вартай і хатнім арыштам у рамках “справы палякаў”, — “выступіла за наладжванне” дыялогу паміж Беларуссю і Польшчай, за што “яе адразу ж пачалі дзяўбсці”. “Вось іх палітыка — палітыка эскалацыі і абвастрэння”, — заявіў Лукашэнка, не ўдакладніўшы, хто канкрэтна так паставіўся да Борыс і хто кіруецца палітыкай эскалацыі.
Кажучы пра Польшчу, ён без прывязкі да чаго-небудзь згадаў пра знікненне спікера Каардынацыйнай рады Анжалікі Мельнікавай: “Яны ж там страцілі спікерку гэтую. Знайсці не могуць! Знайсці не могуць. Дык знайдзіце хоць”.
Лукашэнка назваў палітыку Польшчы ў дачыненні да Беларусі “кан’юнктуршчынай” і выказаў меркаванне, што вынікі запланаваных на травень прэзідэнцкіх выбараў у гэтай краіне “ніяк не памяняюць палітыку польскіх уладаў”.
“Прэзідэнт нічога змяніць не можа. Ён не мае там нейкіх паўнамоцтваў. Будзе нешта бразгаць у сродках масавай інфармацыі, — заявіў аратар. — Але хацелася б, каб быў разважлівы нармальны чалавек. Не трэба прарасійскі, прабеларускі. Прапольскі няхай будзе. Які будзе рабіць у інтарэсах палякаў. Мы гэтага хочам. Калі хочуць, будзем з імі працаваць”.
“Палякі загуляліся. Хто-хто, але палякі нашы ж людзі, славяне. Маглі б жыць нармальна, гандляваць, развівацца. Мы ж аніводнага паляка, калі яны санкцыі ўвялі, адсюль не выгналі. І многія тут працуюць. І няхай працуюць. Нармальна працуюць і лічаць беларусаў нармальнымі людзьмі. Але выбудавалі такую палітыку. Гэта кан’юнктуршчына. Гэта кан’юнктуршчыкі”, — дадаў ён.
Сейм Польшчы: Вынікі выбараў у Беларусі не адлюстроўваюць волю народа
4 красавіка, Позірк. Прэзідэнцкія выбары ў Беларусі, якія адбыліся 26 студзеня, не адпавядалі дэмакратычным стандартам, іх вынік не можа лічыцца сапраўдным адлюстраваннем волі беларускага народа. Вытрымкі з дакумента са спасылкай на агенцтва РАР публікуе партал мясцовага самакіравання Польшчы. За прыняцце …