Абстаноўка на мяжы з Украінай “цалкам кантралюецца” СПА, сцвярджае начальнік штаба

13 красавіка, Позірк. “Абстаноўка [на мяжы з Украінай] напружаная, але цалкам намі кантралюецца“, — заявіў начальнік штаба зенітных ракетных войскаў Андрэй Бабылёў у інтэрв’ю праграме “Арсенал“ на тэлеканале “Беларусь 1“ 13 красавіка.

Паводле яго, у войсках супрацьпаветранай абароны Беларусі “ўважліва сочаць“ за дзеяннямі СПА “як з аднаго, так і з другога боку ў ходзе спецыяльнай ваеннай аперацыі“: “Робім высновы, аналізуем наяўную ў нас інфармацыю і праецыюем яе на сябе. Так, сапраўды некалькі мяняем падыходы да падрыхтоўкі асабістага складу”.

Разам з тым у паветраную прастору Гомельскай вобласці рэгулярна ўрываюцца беспілотныя лятальныя апараты, якія, як мяркуецца, належаць Расіі, якая атакуе аб’екты на ўкраінскай тэрыторыі. Зафіксавана некалькі выпадкаў падзення дронаў на будынкі.

23 сакавіка намеснік міністра ўнутраных спраў — камандуючы ўнутранымі войскамі Мікалай Карпянкоў заявіў, што ў Беларусь “вельмі часта” залятаюць БПЛА з тэрыторыі Украіны.

Карпянкоў дэ-факта прызнаў, што беларуская сістэма абароны не спраўляецца з баявымі дронамі. Іх паходжанне ён не назваў.

Тэрмінам “спецыяльная ваенная аперацыя (СВА)” расійскія і беларускія ўлады называюць поўнамаштабную вайну, развязаную Масквой супраць Украіны 24 лютага 2022 года.