У Беларусі захаваецца падвышаны ўзровень інфляцыі, прагназуе ЕАБР

14 красавіка, Позірк. Захавання ў Беларусі інфляцыі “крыху вышэй за мэтавы арыенцір на фоне росту ўнутранага попыту, што падтрымліваецца павелічэннем заробкаў і пашырэннем крэдытавання”, чакае Еўразійскі банк развіцця.

У штотыднёвым макрааглядзе, апублікаваным 14 красавіка, аналітыкі банка нагадалі, што ў сакавіку інфляцыя ў Беларусі склала 5,9% у гадавым вымярэнні, тады як у лютым — 5,6%.

“Паскарэнне росту цэн адбываецца за кошт падаражэння харчовых тавараў на 7,5% г/г (год да года. — “Позірк”.) у сакавіку пасля 6,7% г/г месяцам раней, што звязана як з падвышэннем цэн на сезонныя тавары, так і паслабленнем беларускага рубля да расійскага (асноўны імпарт прадуктаў харчавання ідзе з РФ) у апошнія месяцы, — гаворыцца ў дакуменце. — Інфляцыя ў паслугах склала 6,6% г/г у сакавіку, што прыкладна адпавядае ўзроўню папярэдняга месяца. Пры гэтым рост цэн на нехарчовыя тавары запаволіўся да 3,2% г/г у сакавіку пасля 3,4% г/г у лютым”.

Як паведамляў “Позірк”, у сакавіку 2025 года спажывецкія цэны выраслі на 0,8% (харчовыя тавары падаражэлі на 1,2%, нехарчовыя — на 0,4%, паслугі — на 0,5%), ад пачатку года — на 2,8% (2,8%; 1,4%; 4,5%).

Згодна з зацверджанымі Аляксандрам Лукашэнкам прагнознымі (дэ-факта — планавымі) параметрамі развіцця Беларусі на 2025 год, перад Нацыянальным банкам і ўрадам стаіць задача абмяжоўваць інфляцыю “на ўзроўні, які не перавышае 5%”.