У шорт-ліст прэміі Prix Voltaire ўвайшлі выдаўцы з Беларусі Надзея Кандрусевіч і Дзмітрый Строцаў

14 красавіка, Позірк. У шорт-ліст літаратурнай прэміі IPA Prix Voltaire 2025 года ўвайшлі беларускія літаратары і выдаўцы Надзея Кандрусевіч і Дзмітрый Строцаў, паведамляе Міжнародная асацыяцыя выдаўцоў (IPA).

Таксама ў шорт-ліст уключаны Махамад Хадзі (Ліван), Амар Інграшан (Алжыр), Мішэль Мушабек (ЗША), Георгій Урушадзэ (Расія).

Адзначаецца, што пісьменнік і перакладчык Надзея Кандрусевіч у 2018 годзе заснавала ў Беларусі выдавецтва “Koska,“. Яно спецыялізавалася на выданні дзіцячых кніг скандынаўскіх пісьменнікаў у перакладзе на беларускую мову. Цяпер “Koska,” не выдае друкаваныя кнігі, Кандрусевіч з 2022 года жыве ў Швецыі, аднак кнігі прадаюцца анлайн.

Паэт Дзмітрый Строцаў з 2022 года пражывае ў Германіі. У яго таксама было сваё выдавецтва ў Мінску — “Вінаград“, якое ўлады пазбавілі ліцэнзіі.

Аўтара 18 кніг вершаў на рускай мове, сябра Беларускага ПЭН-цэнтра, Строцава затрымлівалі ў Беларусі падчас пратэстаў у 2020 годзе, ён адбываў адміністрацыйны арышт.

Строцаў — лаўрэат Рускай прэміі (2007), прэміі Norwegian Authors’ Union’s Freedom of Speech Award (2020), прэміі Фонду бібліятэкі Вацлава Гаўла (2021) і іншых. Вершы перакладзеныя на беларускую, англійскую, грузінскую, італьянскую, латышскую, літоўскую, нямецкую, нарвежскую, польскую, украінскую, французскую, шведскую, чэшскую, эстонскую і іншыя мовы.

У Берліне Строцаў заснаваў Hochroth Minsk — платформу для беларускіх і іншых выгнаных пісьменнікаў.

Летась у шорт-ліст гэтай прэміі ўваходзіў выдавец Андрэй Янушкевіч, вымушана эміграваўшы з Беларусі ў Польшчу.