У Варшаве назвалі “няўмелай правакацыяй” пераезд расійскага генконсульства ў Гродна ў будынак былой польскай арганізацыі

14 красавіка, Позірк. Адкрыццё новага будынка генеральнага консульства Расіі ў Гродне, якое адбылося 3 красавіка ў памяшканні, дзе раней размяшчалася грамадская арганізацыя польскай меншасці — гэта “няўмелая правакацыя“. Так, паводле інфармацыі RMF24, адрэагавалі ў МЗС Польшчы на “рашэнне беларускіх уладаў захапіць будынак Польскага асветніцкага таварыства ў Гродне і перадаць яго консульству“. У знешнепалітычным ведамстве заявілі, што не збіраюцца заяўляць афіцыйны пратэст з гэтай нагоды.

Генконсульства Расіі адкрылася па адрасе вул. Гараднічанская, 40. У рэлізе Гродзенскага аблвыканкама адзначалася, што дыпаб’ект размешчаны “ў больш зручным для наведвальнікаў месцы, чым папярэдняе памяшканне <…> па вул. Цагляная, 2/2“.

Раней па новым адрасе консульства размяшчалася грамадская арганізацыя польскай меншасці “Польска мацеж школьна“ (“Polska Macierz Szkolna”). Арганізацыю ліквідавалі ў 2022 годзе, пабудаваны ў 2011 годзе будынак быў канфіскаваны і выстаўлены на аўкцыён.

Арганізацыя працавала з 1995 года. Пры ёй функцыянавалі грамадскі ліцэй імя пісьменніцы Элізы Ажэшкі, бібліятэка, універсітэт трэцяга ўзросту, жаночы клуб “Граднянка“.

Рэпрэсіі супраць польскай меншасці ў Беларусі ўзмацніліся пасля 2020 года.