Затрыманы настаяцель каталіцкага прыхода ў Вілейскім раёне — праваабаронцы

20 сакавіка, Позірк. Пра затрыманне 16 сакавіка настаяцеля каталіцкага прыхода Адведзінаў Найсвяцейшай Панны Марыі ў в. Альковічы Вілейскага раёна Мінскай вобласці Анатоля Парахневіча паведаміў 20 сакавіка праваабарончы цэнтр “Вясна”.

Паводле даных праваабаронцаў, у сярэдзіне сакавіка таксама было затрымана яшчэ шэсць хрысціянскіх вернікаў, сярод іх двое — прэсвітары евангельскіх цэркваў: “Вядома, што двух затрыманых вызвалілі пасля допытаў, чацвёра дагэтуль застаюцца за кратамі”.

Таксама, паводле даных “Вясны”, былі затрыманы пяць украінскіх бежанцаў, “якім дапамагалі цэрквы”.

Раней нарвежская праваабарончая арганізацыя “Форум18” паведаміла, што ў гэтым месяцы былі вымушаны пакінуць Беларусь каталіцкія святары Павел Кручак і Адам Страчынскі, якія праслужылі ў краіне адпаведна 20 і 11 гадоў, якім было адмоўлена ў працягу рэлігійнай дзейнасці. Абодва служылі ў Пінскай дыяцэзіі (епархіі), якая абслугоўвае Брэсцкую і Гродзенскую вобласці, грамадзяне Польшчы.

Пасля прэзідэнцкіх выбараў 2020 года адносіны паміж уладамі ў Мінску і Рымска-каталіцкім касцёлам у Беларусі ўскладніліся ў сувязі з тым, што многія каталіцкія іерархі і вернікі адкрыта выступілі супраць хвалі гвалту і рэпрэсій, якія рушылі ўслед за масавымі пратэстамі. Некаторыя святары прайшлі праз затрыманні, суды і арышты паводле палітычных матываў, асобныя былі вымушаны пакінуць Беларусь.

Ад пачатку восені 2020 года да 25 верасня 2025-га, згодна з данымі ініцыятывы “Хрысціянская візія”, з рэпрэсіямі ў Беларусі ў той ці іншай форме сутыкнуўся 91 хрысціянскі служыцель, у тым ліку прадстаўнікі Рымска-каталіцкага касцёла ў Беларусі — 35, Беларускай грэка-каталіцкай царквы — пяць, а таксама адзін замежны манах — польскі кармеліт Гжэгаж Гавел.

Верагодна, па-ранейшаму знаходзяцца ў Ватыкане памілаваныя Аляксандрам Лукашэнкам 20 лістапада мінулага года каталіцкія святары Генрых Акалатовіч і Анджэй Юхневіч, сувязі з якімі няма.