У 2024 годзе ў Беларусі захваральнасць на гепатыт А павялічылася ў 8,4 раза ў гадавым вымярэнні
Мадэль віруса гепатыту А
15 красавіка, Позірк. У 2024 годзе захваральнасць на гепатыт А ў Беларусі павялічылася ў 8,4 раза ў параўнанні з 2023-м, вынікае са слоў загадчыцы лабараторыі інфекцый з прыродным рэзервуарам Рэспубліканскага навукова-практычнага цэнтра эпідэміялогіі і мікрабіялогіі Тамары Амвросьевай.
“Паказчык захваральнасці на гепатыт А па выніках 2024 года склаў 7,5 выпадкі на 100 тысяч насельніцтва, што адпавядае сусветнай тэндэнцыі развіцця эпідсітуацыі. У эпідэмічны працэс было ўцягнута ў асноўным дарослае насельніцтва, гэта больш за 50%. Хварэлі таксама дзеці”, — заявіла прафесар 15 красавіка ў Мінску на міжнародным медыцынскім форуме “Ахова здароўя Беларусі”.
Згодна з прадстаўленым ёю слайдам, захваральнасць на гепатыт А ў Беларусі ў 2024 годзе склала 7,48 выпадка на 100 тыс. насельніцтва (зафіксаваныя ў 56 адміністрацыйных адзінках краіны), 2023-м — 0,35, 2015-м — 1,71, 2009-м — 0,88.
Тэлеграм-канал “Белыя халаты” выказаў меркаванне, што прычынай росту захваральнасці на гепатыт А ў Беларусі могуць быць прадукты з Афрыкі або краін Блізкага Усходу.
Адзначалася, што эпідэміёлагі абавязаныя старанна расследаваць кожны выпадак захваральнасці і арганізоўваць неабходныя супрацьэпідэмічныя захады. Пра вынікі публічна не паведамлялася.
Гепатыт А — гэта запаленчае захворванне печані. Вірус распаўсюджваецца галоўным чынам праз харчовыя прадукты ці ваду. У адрозненне ад гепатытаў B і C, гепатыт А не выклікае хранічных захворванняў печані, але можа суправаджацца цяжкімі сімптомамі і прыводзіць, у тым ліку, да смяротнага выніку.