Канюк вызвалены ад пасады амбасадара ў Арменіі

18 красавіка, Позірк. 64-гадовы Аляксандр Канюк вызвалены ад пасады амбасадара Беларусі ў Арменіі, паведаміла прэс-служба Аляксандра Лукашэнкі 17 красавіка.

Былы генеральны пракурор прадстаўляў Мінск у Ерэване з лістапада 2020 года.

Ураджэнец Гродна Канюк — выпускнік Беларускага дзяржаўнага ўніверсітэта па спецыяльнасці правазнаўства. Узначальваў Генеральную пракуратуру з 2011 года да верасня 2020-га. Да гэтага з красавіка 2009 года быў суддзёй і намеснікам старшыні Вярхоўнага суда. Яшчэ раней працаваў суддзёй Беларускага ваеннага суда, старшынёй Мінскага міжгарнізоннага ваеннага суда, а таксама суддзёй і старшынёй Беларускага ваеннага суда.

У час работы Канюка паслом адбылося абвастрэнне адносін паміж Мінскам і Ерэванам.

Арменія не мае намеру вяртаць у Беларусь свайго пасла Разміка Хумарана, які быў адкліканы ў чэрвені мінулага года.

13 чэрвеня 2024-га прэм’ер-міністр Нікол Пашынян заявіў, што ні ён, ні які-небудзь іншы афіцыйны прадстаўнік краіны не паедзе ў Беларусь, пакуль ва ўладзе ў Мінску знаходзіцца Аляксандр Лукашэнка. Ён сказаў пра гэта ў кантэксце заяў Лукашэнкі аб карабахскім канфлікце на сустрэчы з прэзідэнтам Азербайджана Ільхамам Аліевым у сярэдзіне траўня.

Пасля заявы прэм’ера амбасадара Хумарана адклікалі ў Ерэван для кансультацый. У адказ Менск вярнуў з Арменіі Канюка (мяркуючы па інфармацыі МЗС, вярнуўся ў Ерэван у канцы лета).

Адносіны Арменіі з асобнымі членамі інтэграцыйных утварэнняў на постсавецкай прасторы пачалі астываць з канца 2020 года на фоне карабахскага канфлікту. Пасля другой вострай фазы ў верасні 2023 года ён завяршыўся скасаваннем самаабвешчанай Нагорна-Карабахскай Рэспублікі, якую ў тым ліку ў ваенным плане падтрымліваў Ерэван, і пераходам рэгіёну пад кантроль Азербайджана.

Арменія, незадаволеная адсутнасцю падтрымкі з боку АДКБ, афіцыйна замарозіла, а фактычна спыніла ўдзел у гэтым ваенна-палітычным блоку (31 сакавіка 2025 года МЗС пацвердзіла, што не мае намеру ўдзельнічаць у фінансаванні дзейнасці арганізацыі). Адначасова Ерэван стаў сігналізаваць аб гатоўнасці да збліжэння з Еўрасаюзам.

12 верасня 2024 года Лукашэнка выказаў меркаванне, што ў пагаршэнні адносін з Ерэванам віны Мінска няма.

4 красавіка прэзідэнт Ваагн Хачатуран падпісаў закон “Аб пачатку працэсу ўступлення Рэспублікі Арменія ў Еўрапейскі саюз”.