У Пскоўскай вобласці затрымалі фуру з Беларусі з 20 т падсанкцыйнай рыбы

21 красавіка, Позірк. У Пскоўскай вобласці Расіі затрымалі партыю марожанай рыбы, якую перавозілі з тэрыторыі Беларусі ў Маскву, паведаміла 21 красавіка рэгіянальнае аддзяленне Федэральнай службы па ветэрынарным і фітасанітарным наглядзе (Рассельгаснагляд).

Паводле інфармацыі ведамства, пры аглядзе грузавіка супрацоўнікі Рассельгаснагляду знайшлі больш за 20 тон аўстралійскай серыалелы (разам з некаторымі іншымі відамі рыбы вядомая пад зборнай назвай “алейная рыба”), вырабленай прадпрыемствам з Новай Зеландыі. У дачыненні да гэтага тавару, як адзначаецца, “уведзеныя спецыяльныя эканамічныя меры ў мэтах гарантавання бяспекі Расіі”.

Тавар канфіскавалі і, як сцвярджаецца, знішчылі.

20 сакавіка паведамлялася, што віцебскія мытнікі спынілі спробу вывазу ў РФ 13 т ахалоджанага ласося коштам амаль 900 тыс. рублёў. Згодна з дакументамі ў грузавіку мусілі быць ванільныя сушкі.

6 сакавіка Дзяржаўны мытны камітэт таксама паведамляў пра спробу вывазу з Беларусі ў РФ буйной партыі ахалоджанага ласося. Парушэнне патрабаванняў транспартавання рыбнай прадукцыі было зафіксаванае гомельскімі мытнікамі “пры правядзенні спецыяльных мерапрыемстваў паблізу беларуска-расійскага ўчастка мяжы”.