23 красавіка, Позірк. Візіт беларускага дэмакратычнага лідара Святланы Ціханоўскай у Злучаныя Штаты Амерыкі адбудзецца 1–7 траўня, паведамляе прэс-служба Аб’яднанага пераходнага кабінета (АПК).
Паводле інфармацыі АПК, палітык сярод іншага возьме ўдзел у форуме ў Седоне (Арызона), які ладзіць Інстытут Макейна, а таксама ў Munich Leaders Meeting і публічным мерапрыемстве ў Інстытуце Хадсана ў Вашынгтоне (акруга Калумбія).
Будучы візіт у ЗША Ціханоўская анансавала 16 красавіка ў эфіры ютуб-канала “И Грянул Грэм”. Тады палітык заявіла, што плануе сустрэцца як з прадстаўнікамі адміністрацыі прэзідэнта Дональда Трампа, так і з кангрэсменамі.
“Мы спрабуем данесці нашу пазіцыю і важнасць падтрымкі як Украіны, так і Беларусі, таму што мы лічым, што свабодная Беларусь таксама ў інтарэсах ЗША”, — сказала дэмлідар.
У 2024 годзе Ціханоўская наведвала ЗША двойчы, агулам — не менш за восем разоў.
