Пасля экстрадыцыі з РФ жыхар Гродна прыгавораны да абмежавання волі за ўхіленне ад вайсковай службы

29 красавіка, Позірк. Суд Ленінскага раёна Гродна прыгаварыў 20-гадовага мясцовага жыхара да 1,5 года пазбаўлення волі з накіраваннем у папраўчую ўстанову адкрытага тыпу, паведамляе прэс-служба Генеральнай пракуратуры.

Фігурант справы прызнаны вінаватым паводле ч. 1 арт. 435 Крымінальнага кодэкса (ухіленне ад мерапрыемстваў па прызыву на вайсковую службу).

Паводле звестак следства, абвінавачаны, “атрымаўшы асабіста пад подпіс позву аб яўцы на 30 жніўня 2023 года ў ваенкамат” для праходжання медкамісіі, “не з’явіўся без паважных прычын у прызначаны дзень”. Тым самым ён “перашкодзіў прыняццю прызыўной камісіяй у дачыненні да яго рашэння аб выкананні вайсковага абавязку”.

У судзе жыхар Гародні паведаміў, што не прыйшоў у ваенкамат, бо знаходзіўся ў Расіі “ў сувязі з паступленнем у навучальную ўстанову для атрымання вышэйшай адукацыі”.

Падкрэсліваецца, што ў Беларусь студэнт быў экстрадаваны на запыт Генпракуратуры “для прыцягнення да крымінальнай адказнасці”.

Справа разглядалася ў адной з аўдыторый Гродзенскага дзяржаўнага аграрнага ўніверсітэта, куды, як вынікае з апублікаваных фота, спецыяльна склікалі студэнтаў.

“Пасля судовага пасяджэння дзяржаўны абвінаваўца выступіла перад прысутнымі і патлумачыла ім адказнасць за ўхіленне ад мерапрыемстваў па прызыву на тэрміновую ваенную службу”, — гаворыцца ў паведамленні.

Паводле ч. 1 арт. 435 КК магчыма пакаранне ад штрафу да пазбаўлення волі на тэрмін да двух гадоў.

Згодна з прынятымі ў 2023 годзе папраўкамі ў закон “Аб вайсковым абавязку і вайсковай службе”, абітурыенты, якія паступаюць у замежныя — у тым ліку расійскія — ВНУ, пазбаўленыя права на атрыманне адтэрміноўкі ад прызыву ў войска.