Латушка паведаміў пра размову на тэму незалежнасці Беларусі з часовым павераным у яе справах у Польшчы
4 траўня, Позірк. Думаць аб нацыянальных інтарэсах заклікаў кіраўнік Народнага антыкрызіснага ўпраўлення (НАУ) Павел Латушка дыпламатаў, якія прадстаўляюць за мяжой афіцыйны Мінск, ў відэазвароце, размешчаным 4 траўня на ягоным ютуб-канале.
Відэа запісана на фоне прэзідэнцкага палаца ў Варшаве напярэдадні — палітык прыняў удзел ва ўрачыстасцях на Дзень Канстытуцыі 3 мая. Ён таксама коратка паразмаўляў з прэзідэнтам Анджэем Дудай.
Латушка звярнуў увагу, што прадстаўнікоў Мінска, як і ў мінулыя гады, на мерапрыемствы не запрасілі.
“Гэта для разумення вашага, каму вы служыце, што вы робіце. Вы служыце злачыннаму рэжыму, які знішчае не толькі свабоду, не толькі беларусаў. Ён знішчае нашу дзяржаву, нашу незалежнасць”, — звярнуўся ён да беларускіх дыпламатаў.
“Калісьці ў мяне была тэлефонная размова, нядаўна, з часовым павераным у справах Беларусі ў Польшчы. І ён мне на мой аргумент сказаў: “Ну я ж раблю ўсё, каб захаваць незалежнасць нашай краіны”. Ды не, вы робіце ўсё, каб Беларусь страціла гэту незалежнасць”, — дадаў кіраўнік НАУ.
У краіне дзейнічае “найбольшая колькасць цэнтраў Россупрацоўніцтва, адкрываюцца консульскія ўстановы Расіі, плануюцца вучэнні “Захад”, падпісваюцца дагаворы, якія даюць права без абмежаванняў размяшчаць расійскую армію на тэрыторыі Беларусі”, пералічыў былы амбасадар.
“Калі праводзіцца расійская, рускамірская ідэалогія ў нашай краіне. Калі фактычна наша краіна крок за крокам інкарпаруецца, уцягваецца ў склад Расійскай Федэрацыі — няўжо вы гэтага не разумееце?” — сказаў Латушка.
Іншыя падрабязнасці размовы ён не прывёў.
Палітык нагадаў пра сувязь падзеяў 1791 года пры прыняцці Канстытуцыі Рэчы Паспалітай, якая стала першай у Еўропе, з гісторыяй Беларусі.
“Мы належым да агульнаеўрапейскай гістарычнай прасторы, юрыдычнай прасторы, прасторы свабоды”, — адзначыў ён у сувязі з гэтым.
Аляксандр Лукашэнка, лічыць кіраўнік НАУ, ніколі не хацеў мець добрых адносін з Польшчай: “Ён дэманструе гэта сёння, накіроўваючы тысячы, дзясяткі тысяч мігрантаў, трымаючы ў турме Анджэя Пачобута”.
Дыпламатычныя адносіны паміж Беларуссю і Польшчай былі ўстаноўлены 2 сакавіка 1992 года.
Паводле апошняй публічнай інфармацыі, пасаду часовага паверанага ў справах Беларусі ў Польшчы займаў Аляксей Панкраценка. Актуальныя даныя на сайце дыпмісіі адсутнічаюць.
