На цырымоніі да 80-годдзя вызвалення канцлагера Маўтхаўзен будзе дэлегацыя дэмсіл на чале з Латушкам

10 траўня, Позірк. У памятных мерапрыемствах, прысвечаных 80-й гадавіне вызвалення канцэнтрацыйнага лагера Маўтхаўзен у Аўстрыі, 11 траўня возьме ўдзел дэлегацыя дэмакратычных сіл Беларусі на чале з намеснікам кіраўніцы Аб’яднанага пераходнага кабінета, кіраўніком Народнага антыкрызіснага ўпраўлення Паўлам Латушкам, паведаміла “Позірку” прэс-служба палітыка.

У складзе дэлегацыі таксама будуць прадстаўнікі “народнай амбасады” ў Аўстрыі і беларускай дыяспары. Цырымонія памяці адбудзецца непасрэдна ў мемарыяльным комплексе Маўтхаўзен.

Латушка разам з прадстаўнікамі дыяспары браў удзел у аналагічнай акцыі ў 2022 годзе.

Выданне Salzburger Nachrichten, звярнула ўвагу прэс-служба палітыка, паведаміла са спасылкай на Федэральную канцылярыю Аўстрыі, што прадстаўнікі рэжымаў Аляксандра Лукашэнкі і Уладзіміра Пуціна не з’яўляюцца “жаданымі гасцямі” на мерапрыемствах, прысвечаных вызваленню Аўстрыі ў траўні 1945 года, з пачатку паўнамаштабнай вайны РФ супраць Украіны.

Сёлета ў сярэдзіне красавіка амбасадар РФ ў Аўстрыі Дзмітрый Любінскі заявіў выданню “Известия”, што Вена зноў не запрасіла расійскіх дыпламатаў на гадавіну вызвалення Маўтхаўзена.

Беларускіх дыплатамаў гэта, імаверна, таксама тычыцца. На гэта паказвае публікацыя ў анлайн-выданні Zeitung der Arbeit камуністычнай Партыі труда Аўстрыі (Partei der Arbeit Österreichs, PdA), якая на пачатку траўня, крытыкуючы Міжнародны камітэт памяці і барацьбы супраць фашызму Маўтхаўзен за рашэнне не запрашаць Расію на 80-годдзе вызвалення канцлагера, згадвае таксама Беларусь.

Афіцыйныя дэлегацыі Беларусі і РФ не былі запрошаныя ў Маўтхаўзен у 2022, 2023 і 2024 гадах.