Вайсковыя медыкі з Беларусі абмяркоўваюць палявую тэрапію і хірургію на семінары ў Кітаі

13 траўня, Позірк. Медыцынскае забеспячэнне і рэабілітацыю вайскоўцаў, эвакуацыю пацярпелых з рознымі траўмамі, палявую тэрапію і хірургію абмяркоўваюць 13–16 траўня ў кітайскім Сіяне на семінары па вайсковай медыцыне для дзяржаў — членаў Шанхайскай арганізацыі супрацоўніцтва, паведамляе прэс-служба Міністэрства абароны Беларусі.

У сустрэчы сярод іншых удзельнічае беларуская дэлегацыя. Іх удзел, адзначае ведамства, “дазволіць абмяняцца досведам у галіне дыягностыкі і лячэння пацярпелых з рознымі траўмамі, абмеркаваць новыя методыкі рэабілітацыйнай медыцыны”.

На мінулагоднім такім мерапрыемстве ў пакістанскім Равалпіндзі ўдзельнікі абмеркавалі пытанні развіцця сучаснай вайсковай медыцыны, уключаючы прымяненне інавацыйных метадаў і новых тэхналогій для далейшага яе ўдасканалення.

Тады прадстаўнік Узброеных сіл Пакістана генерал Сахір Шамшад Мірза адзначыў, што неабходна зрабіць эфектыўныя захады для “ўдасканалення вайсковай медыцыны, умацавання яе магчымасцей і патэнцыялу з мэтай эфектыўнага супрацьстаяння сучасным выклікам і пагрозам”.

Адной з ключавых задач ён назваў пашырэнне профільнай супрацы паміж дзяржавамі — членамі ШАС.

Беларусь інтэгравалася ў ШАС амаль 15 гадоў. У 2010 годзе яна атрымала статус партнёра арганізацыі, у 2015-м — назіральніка. У ліпені 2022 года Мінск падаў заяўку на далучэнне да ШАС у якасці паўнапраўнага члена. Дакументы пра ўступленне Беларусі ў арганізацыю падпісаныя 4 ліпеня 2024 года ў Астане (Казахстан).

Шанхайская арганізацыя супрацоўніцтва створаная ў 2001 годзе. Дэкларацыю пра яе заснаванне падпісалі кіраўнікі Казахстана, Кітая, Кыргызстана, Расіі, Таджыкістана і Узбекістана. Пазней да арганізацыі далучыліся Індыя, Іран, Пакістан.