Ініцыятыва дапамогі эмігрантам “Партызанка” просіць падтрымкі праз чаканае павелічэнне нагрузкі
13 траўня, Позірк. Ініцыятыва “Партызанка” (Partyzanka), якая займаецца прававой дапамогай беларускім палітычным эмігрантам, просіць падтрымкі праз чаканае павелічэнне нагрузкі на фоне скарачэння дзейнасці шэрагу зарэгістраваных у Польшчы профільных арганізацый.
У камунікаце, які апублікавала на сваёй старонцы ў “Фэйсбуку” юрыстка ініцыятывы Ганна Маціеўская, гаворыцца, што “Партызанка” заўсёды “пераследавала мэту эфектыўнай дапамогі максімальнай колькасці ўцекачоў з Беларусі, якія знаходзяцца ў складанай сітуацыі”.
“І нас вельмі засмуціла навіна, што нашыя калегі з ЦБС (Цэнтра беларускай салідарнасці. — “Позірк”.) і Polskie Forum Migracyjne з прычыны фінансавых складанасцяў вымушаныя былі прыпыніць дзейнасць па юрыдычнай і інфармацыйнай падтрымцы ўцекачоў”, — гаворыцца ў паведамленні, якое з’явілася на наступны дзень пасля весткі пра тое, што ЦБС спыніў працу аддзела прававой дапамогі праз адсутнасць фінансавання.
У гэтай сітуацыі, як адзначана ў камунікаце, “Партызанка” застаецца “адзінай буйной арганізацыяй па юрыдычнай дапамозе беларускім уцекачам у Польшчы”.
“На нашыя плечы ўпадзе ў разы большая колькасць кейсаў пры ранейшым узроўні рэсурсаў — мы заўсёды былі і застанемся камеральнай арганізацыяй, нягледзячы на высокую эфектыўнасць працы ў лічбах. У той жа час Partyzanka не мае грантавага фінансавання і апынаецца ў вельмі нестабільнай фінансавай сітуацыі. Мы не можам дазволіць закрыцца інфалініі Partyzanka для ўцекачоў”, — падкрэсліла ініцыятыва.
У сувязі з гэтым “Партызанка” просіць падтрымаць яе, каб ініцыятыва і надалей магла “забяспечыць дапамогу тым, хто знаходзіцца ў цяжкай сітуацыі”. Магчымыя варыянты падтрымкі пазначаныя ў яе тэлеграм-канале.
2 траўня “Партызанка” заявіла, што працягне аказваць прававую дапамогу беларускім палітычным эмігрантам нават пасля таго, як улады прызналі яе “экстрэмісцкім фармаваннем”.
Прадстаўніцы ініцыятывы — Ганна Маціеўская і мастачка Яна Шостак — заявілі пра намер звярнуцца ў польскія праваахоўныя органы “ў рамках універсальнай юрысдыкцыі аб здзяйсненні злачынства супраць чалавечнасці ў дачыненні да грамадзянак Польшчы”.
Ініцыятыва адзначыла, што кваліфікуе дзеянні ўладаў у Мінску як транснацыянальныя рэпрэсіі. “Мы лічым гэта важным крокам да прыцягнення беларускага рэжыму да адказнасці, таму што ў адпаведнасці з польскім Крымінальным кодэксам, заява ў межах універсальнай юрысдыкцыі супраць грамадзян Польшчы мае іншую кваліфікацыю”, — падкрэслівалася ў заяве.
З меркаванняў бяспекі “Партызанка” рэкамендавала асобам, якія знаходзяцца альбо бываюць у Беларусі, не пакідаць рэакцыі і не каментаваць публікацыі праекта на яго старонках у сацсетках.
Маціеўская адзначыла на сваёй старонцы ў “Фэйсбуку”, што, паводле яе інфармацыі, яна з’яўляецца першым юрыстам-практыкам, якога прызналі ўдзельнікам “экстрэмісцкага фарміравання” за ажыццяўленне “менавіта юрыдычнай дзейнасці”.
“Партызанка” і я, у прыватнасці, займаемся аказаннем юрыдычнай дапамогі на тэрыторыі Рэспублікі Польшча, у тым ліку інфармуючы ўцекачоў пра іх правы і абавязкі на падставе польскага заканадаўства. Апошні раз я знаходзілася на тэрыторыі РБ у ліпені 2020-га, яшчэ да прэзідэнцкіх выбараў 9.08.2020. Мы не ажыццяўляем дзейнасці на тэрыторыі Беларусі, таксама мы не ажыццяўляем палітычнай дзейнасці”, — падкрэсліла тады юрыстка.
Маціеўская — супрацоўніца юрыдычнай фірмы WKB Lawyers (Польшча), сузаснавальніца ініцыятывы “Партызанка”.
Разам з Марыяй Колесавай-Гудзілінай яна абараняла ў судзе рэжысёра Андрэя Гнёта, затрыманага 30 кастрычніка 2023 года памежнай службай Сербіі пасля прылёту ў Бялград. Мінск патрабаваў выдачы мужчыны, аднак яго ўдалося абараніць. Гнёт быў вызвалены ў кастрычніку 2024 года.
