Турчын распарадзіўся перасеяць палі, на якіх з-за замаразкаў загінулі азімыя

14 траўня, Позірк. Чаргаванне ў красавіку-траўні цёплага надвор’я з “рэзкім пахаладаннем і працяглымі замаразкамі” негатыўна паўплывала на  развіццё сельскагаспадарчых культур ва ўсіх рэгіёнах, найбольш пацярпелі пасевы азімых культур”, заявіў на нарадзе 14 траўня прэм’ер-міністр Аляксандр Турчын.

Паводле яго слоў, якія перадае прэс-служба ўрада, “кліматычныя ўмовы бягучага года” дазволілі сельгасарганізацыям “прыступіць да вясновых палявых работ у сакавіку”, гэта значыць “практычна на месяц раней існуючых тэрмінаў”. Цяпер жа, дадаў прэм’ер, “пашкоджаныя пасевы адназначна патрабуюць дадатковых даглядных мер, а тыя, якія не ўдалося выратаваць, — перасеву”.

Гаворка ідзе пра “перасеў пашкоджаных плошчаў аднагадовымі травамі і кукурузай на збожжа”, сказаў Турчын.

“Усе работы павінны быць завершаныя да 1 чэрвеня. Таксама акцэнтую ўвагу, што безгаспадарчасць не атрымаецца спісаць на ўмовы надвор’я”, — заявіў чыноўнік.

Як паведамляў “Позірк”, тэмпературныя антырэкорды фіксаваліся ў Беларусі, у прыватнасці, 6 начэй запар, пачынаючы з ночы на 6 траўня, аб перакрыцці альбо паўтарэнні рэкордаў холаду ў розных рэгіёнах краіны паведамлялася як мінімум з 8 красавіка да 12 траўня.

Паводле даных Міністэрства сельскай гаспадаркі і харчавання, агульны ўраджай збожжавых і зернебабовых культур у Беларусі ў 2024 годзе (з улікам рапсу) склаў 10,3 млн тон пры сярэдняй ураджайнасці больш за 38 цэнтнераў з гектара.