14 траўня, Позірк. Праведзены трыццаць год таму з ініцыятывы “стаўленіка Масквы” Аляксандра Лукашэнкі “так званы рэфэрэндум” меў “разбуральныя наступствы для нацыі”, гаворыцца ў заяве Рады Беларускай Народнай Рэспублікі (БНР) “Аб антыканстытуцыйным рэферэндуме 1995 году”, апублікаванай на старонцы арганізацыі ў “Фэйсбуку”.
“У выніку было гвалтоўна спыненае нацыянальнае Адраджэнне, беларуская мова загнаная ў гета, парламентарызм знішчаны, а краіна палітычна і эканамічна прывязаная да Расіі”, — адзначылі ў Радзе БНР (тут і далей арфаграфія захавана).
Арганізацыя нагадала, што рэферэндум быў прызначаны незаконна, “праз збіццё дэпутатаў парламенту, падчас яго правядзення адбываліся парушэнні заканадаўства і фальсыфікацыі”, “вынікі гэтага рэфэрэндуму ня маюць юрыдычнай сілы”.
Рада БНР “ўхваляе грамадзянскую пазыцыю беларусаў, якія і на Бацькаўшчыне, і ў эміграцыі захоўваюць вернасць Бел-Чырвона-Беламу сцягу і гербу “Пагоня”, адданасць беларускай мове, прынцыпам дэмакратыі”.
У “новай вольнай Беларусі” нацыянальным сімвалам і беларускай мове “будзе вернуты іх законны статус, парушаны антыканстытуцыйным рэфэрэндумам 1995 году”, лічыць яна.
14 траўня 1995 году па ініцыятыве Александра Лукашэнкі ў Беларусі прайшоў рэферэндум. У бюлетэнь для галасавання ўносіліся пытанні аб наданні расійскай мове статусу дзяржаўнай; аб зьмяненні дзяржаўнай сімволік (бел-чырвона-белы сцяг і герб “Пагоня” прапанавалася змяніць на сімвалы, амаль ідэнтычныя з тымі, што мела БССР); аб эканамічнай інтэграцыі з Расіяй; аб надзяленні прэзыдэнта правам распускаць Вярхоўны Савет датэрмінова.
Аўтарызавацца
Забыліся пароль?
Выхад з профілю
