Мінінфарм нагадаў аб забароне на продаж у Беларусі “шкоднаснай літаратуры” найбуйнейшага расійскага выдавецтва “Эксма”

15 траўня, Позірк. У сувязі з крымінальнай справай у Расіі супраць супрацоўнікаў выдавецтва “Эксма” па справе аб “экстрэмізме”, Міністэрства інфармацыі Беларусі запатрабавала ад распаўсюджвальнікаў кніг “правесці рэвізію рэалізаваных друкаваных выданняў”.

Як сцвярджаецца ў паведамленні ведамства, прычына затрымання фінурантаў — “прапаганда прызнанага экстрэмісцкім і забароненага на тэрыторыі Расіі “міжнароднага руху ЛГБТ” у кнігах выдавецтва “Popcorn books” (у жніўні 2023 года “Эксма” купіла 51% акцый. — “Позірк”.).

Мінінфарм заявіў, што “цікавасць праваахоўнікаў да дадзенага выдавецтва заканамерная і абгрунтавана зразумелая”, бо “толькі ў спісе друкаваных выданняў, якія змяшчаюць інфармацыйныя паведамленні і (або) матэрыялы, распаўсюджванне якіх здольна нанесці шкоду нацыянальным інтарэсам Беларусі, твораў і аўтараў выдадзеных выдавецкай групай “ЭКСМА-АСТ” <…> больш за 50%“.

“Гэтыя кнігі, на думку членаў Рэспубліканскай камісіі па правядзенні ацэнкі, сімволікі, атрыбутыкі, інфармацыйнай прадукцыі, з’яўляюцца крыніцай прапаганды нетрадыцыйных сексуальных адносін, парнаграфіі, насілля і жорсткасці, ужывання наркотыкаў, а таксама папулярызацыі нетрадыцыйных для беларускага грамадства субкультур”, — гаворыцца ў рэлізе.

Міністэрства інфармацыі “ў чарговы раз” звярнулася да кіраўнікоў арганізацый, якія ажыццяўляюць дзейнасць па распаўсюджванні друкаваных выданняў, з напамінам “самастойна выключыць з продажу друкаваныя выданні, распаўсюджванне якіх здольна нанесці шкоду нацыянальным інтарэсам нашай краіны, а таксама перагледзець спіс сваіх контрагентаў і пастаўшчыкоў, якія дазваляюць сабе выдаваць і распаўсюджваць літаратуру”.

“Нагадваем, распаўсюджванне такой шкоднаснай літаратуры на тэрыторыі Рэспублікі Беларусь забаронена”, — падкрэсліла ведамства.

Інфармацыю аб затрыманні дырэктара па дыстрыбуцыі выдавецтва “Эксма” Анатоля Наравяткіна і яшчэ каля 10 чалавек у Маскве ў рамках расследавання крымінальнай справы аб “экстрэмізме” распаўсюдзіла напярэдадні са спасылкай на неназваныя “праваахоўныя органы” агенцтва ТАСС.

Гаворка аб арт. 282.2. КК РФ (арганізацыя дзейнасці экстрэмісцкай арганізацыі).

Кніга Алены Малісавай і Кацярыны Сільванавай, якая выйшла ў Popcorn Books “Лета ў піянерскім гальштуку“ — раман аб адносінах піянера і яго важатага ў савецкім летнім лагеры — стала падставай для ўзбуджэння першай у Расіі справы аб “прапагандзе ЛГБТ” у студзені 2023 года, піша расійская служба BBC.

Выдавецтва “Эксма” было заснавана ў 1991 годзе і з’яўляецца найбуйнейшым у Расіі. На долю выдавецкай групы “Эксма-АСТ” прыпадае да 70% кніжнага рынку краіны.

Раней расійскія ўлады ўжо прад’яўлялі прэтэнзіі да зместу кніг, якія выйшлі ў ім.