21 траўня, Позірк. Нягледзячы на “нелегітымныя заходнія санкцыі” Беларусь “штогод дасягае рэкордных паказчыкаў” двухбаковага гандлю з Кітаем, заявіў першы віцэ-прэм’ер Мікалай Снапкоў на сустрэчы 21 траўня ў Мінску з намеснікам прэм’ера Дзяржсавета КНР Лю Гачжунам.
Паводле слоў Снапкова, якія перадае прэс-служба ўрада, “за апошнія пяць гадоў” абарот паміж дзвюма краінамі “вырас у два разы і ў мінулым годзе склаў рэкордныя 8, 6 млрд амерыканскіх долараў”.
“Сумесныя дасягненні нашых краін на справе адпавядаюць устаноўленаму кіраўнікамі нашых краін узроўню ўсепагоднага і ўсебаковага стратэгічнага партнёрства. У жніўні мінулага года адбыўся афіцыйны візіт прэм’ера Дзяржаўнага савета Лі Цяна ў нашу краіну, у рамках якога былі вызначаныя ключавыя задачы ўрадаў дзвюх краін на бліжэйшую перспектыву. Галоўная задача, цэнтравая задача — гэта развіццё прадукцыйных сіл новай якасці”, — сказаў віцэ-прэм’ер.
Словы Снапкова супярэчаць даным аб абароце з Кітаем, апублікаваным на сайце Міністэрства замежных спраў. Згодна з гэтай інфармацыяй, аб’ём гандлю таварамі і паслугамі паміж Беларуссю і КНР у 2019 годзе склаў 5,3 млрд долараў, у 2020-м — 5,38 млрд, у 2021-м — 5,85 млрд. У 2018-м абарот быў 4,39 млрд долараў.
З 2021 года даныя аб узаемным гандлі беларускім бокам не публікуюцца.
