Амбасада Венгрыі ў Мінску адкрые выбарчы ўчастак для галасавання на парламенцкіх выбарах у гэтай краіне

Апублікавана на адкрытай версіі “Позірку” 11 красавіка 2026 года ў 13:39

11 красавіка, Позірк. Амбасада Венгрыі ў Мінску 12 красавіка адкрые выбарчы ўчастак для галасавання на парламенцкіх выбарах у гэтай краіне.

Венгерскія грамадзяне, якія знаходзяцца ў Беларусі, змогуць прагаласаваць з 6 да 19 гадзін, паведамляе дыпмісія, размешчаная на вуліцы Платонава, 1Б.

Заявы на ўключэнне ў рэестр выбаршчыкаў прымаліся да 18 сакавіка.

Дзяржаўны сход (парламент) Венгрыі абіраецца па змяшанай сістэме: 93 з 199 дэпутатаў — па партыйных спісах, 106 — па аднамандатных акругах.

Паводле апытанняў грамадзкай думкі, кіруючая 16 гадоў партыя “Фідэс” (Альянс маладых дэмакратаў, створаны ў 1988 годзе) 62-гадовага прэм’ер-міністра Віктара Орбана можа страціць уладу. Лідарам электаральнай гонкі з’яўляецца партыя “Ціса” 45-гадовага былога актывіста “Фідэс“ Петара Мадзьяра.

Нягледзячы на тое, што Венгрыя — член Еўрапейскага саюза і НАТО, Орбан адкрыта апаніруе Брусэлю і сімпатызуе Маскве, выступае супраць дапамогі Украіне ў адбіцці расійскай агрэсіі. Напярэдадні выбараў былі апублікаваныя запісы тэлефонных перамоваў, як сцвярджаецца, Орбана з прэзідэнтам Расіі Уладзімірам Пуціным і міністра замежных спраў Венгрыі Петара Сіярта з расійскім калегам Сяргеем Лаўровым. Са зместу гутарак вынікала, што Будапешт гатовы надаваць Маскве любое садзейнічанне ў прасоўванні яе інтарэсаў.

Венгрыя як член Еўрасаюза фармальна падтрымлівае санкцыі ЕС супраць беларускіх уладаў, аднак прадстаўленая ў Беларусі на ўзроўні надзвычайнага і паўнамоцнага амбасадара (найвышэйшы ўзровень дыпламатычнага прадстаўніцтва) — разам з членам ЕС Славакіяй, дзе прэм’ер-міністрам з’яўляецца прарасійскі настроены Роберт Фіца.

Віктар Орбан сустракаўся з Аляксандрам Лукашэнкам у Мінску ў чэрвені 2020 года, у разгар эпідэміі каранавіруса, за два месяцы да прэзідэнцкіх выбараў у Беларусі.

Петар Сіярта наведваў Мінск не менш за пяць разоў за апошнія 2,5 года (у лістападзе 2023 года, траўні і кастрычніку 2024-га, верасні і кастрычніку 2025-га). Падчас перадапошняга візіту ў інтэрв’ю тэлеканалу “Беларусь 1“ ён заявіў, што санкцыі ЕС “нашкодзілі больш Еўропе і еўрапейскай эканоміцы, чым Беларусі ці Расіі”.

У жніўні 2025 года, віншуючы прэм’ер-міністра Орбана і прэзідэнта Тамаша Шуёка (мае абмежаваныя паўнамоцтвы) з нацыянальным святам Венгрыі — Днём Святога Іштвана. Аляксандр Лукашэнка выказаў меркаванне, што Мінск і Будапешт здольныя “зрабіць сумесны ўнёсак ва ўмацаванне рэгіянальнай бяспекі, ролі міжнароднага права і ўстойлівай стратэгічнай стабільнасці”.