На атракцыёне ў Магілёве загінуў 18-гадовы стажор

1 траўня, Позірк. У Магілёве ўдзень 1 траўня загінуў 18-гадовы хлопец, паведамляе прэс-служба Следчага камітэта.

Паводле папярэдняй інфармацыі, стажор, які праходзіў навучанне на пасаду аператара атракцыёнаў, дапамагаў наведвальніку бяспечна пакінуць карусель і “не зафіксаваў працоўны механізм”.

“У гэты момант яго зачапіла рухомая частка атракцыёну. У выніку ён атрымаў цяжкую траўму галавы, ад якой памёр”, — гаворыцца ў паведамленні.

Следчы са спецыялістамі Дзяржкамітэта судовых экспертыз аглядае месца здарэння. Каб аднавіць храналогію падзей, апытваюцца відавочцы і адміністрацыя парка.

“Забіраюцца эксплуатацыйная дакументацыя на атракцыён і журналы інструктажоў па тэхніцы бяспекі і ахове працы. Плануецца прызначэнне комплексу экспертных даследаванняў”, — адзначае СК.

Асноўная версія, чаму адбылася трагедыя, — парушэнне правілаў тэхнікі бяспекі.

Справай займаецца Магілёўскі міжраённы аддзел СК.