Лідар “Моладзевага наступу” Лізавета Пракопчык абраная другім віцэ-спікерам Каардынацыйнай рады

21 траўня, Позірк. Другім віцэ-спікерам Каардынацыйнай рады (КР) трэцяга склікання абраная лідар фракцыі “Моладзевы наступ” Лізавета Пракопчык. Пра гэта паведамляецца ў тэлеграм-канале КР.

За яе кандыдатуру прагаласаваў 41 дэлегат, супраць — двое, устрымалася чацвёра. У галасаванні ўзялі ўдзел 47 з 79 дэлегатаў.

“Лізавета мае вопыт у грамадскай дзейнасці і прадстаўляе інтарэсы моладзі”, — адзначае КР.

Раней у Каардынацыйнай радзе быў адзін віцэ-спікер — Станіслава Гліннік.

Пракопчык нарадзілася ў Магілёве. У 2016 годзе паступіла ў Мінскі дзяржаўны лінгвістычны ўніверсітэт, адкуль была выключаная ў 2020-м за ўдзел у пратэстным руху. З’яўляецца генеральным сакратаром Беларускага нацыянальнага маладзёжнага савета РАДА і даследчыкам інстытута “Палітычная сфера”.

14 траўня спікерам КР быў абраны 34-гадовы Арцём Брухан. Выбары прайшлі ў сувязі са знікненнем у канцы сакавіка Анжалікі Мельнікавай, якая займала гэтую пасаду.