Прадукцыя беларускага ВПК пастаўляецца больш чым у 60 краін — кіраўнік Дзяржкамваенпрама
Дзмітрый Пантус на выставе MILEX-2025
25 траўня, Позірк. Геаграфія паставак прадукцыі беларускага ваенна-прамысловага комплекса ўключае больш за 60 краін, заявіў у праграме “Галоўны эфір“ на тэлеканале “Беларусь 1“ старшыня Дзяржаўнага ваенна-прамысловага камітэта Дзмітрый Пантус (інтэрв’ю выйшла 25 траўня).
Размова была запісаная падчас XII Міжнароднай выставы ўзбраення і ваеннай тэхнікі MILEX-2025, якая адбывалася ў Мінску з 21 па 24 траўня. Паводле сцвярджэння Пантуса, гэтая выстава прынесла беларускаму ВПК рэкордны за яе гісторыю партфель кантрактаў больш чым на 390 млн долараў. На мінулым форуме два гады таму сума склала 277 млн долараў.
Пантус паведаміў, што выставу MILEX-2025 наведала звыш 50 афіцыйных дэлегацый з больш чым 30 дзяржаў. На ёй было прадстаўлена больш за 750 узораў рознай тэхнікі з шасці краін: Беларусі, Расіі, Ірана, Кітая, Пакістана і Індыі.
Паводле яго слоў, на выставе было прадстаўлена вельмі шмат беспілотных лятальных апаратаў, “але не менш маштабна былі прадстаўлены і сродкі барацьбы з беспілотнікамі“. “Беларусь у гэтым кірунку вельмі сур’ёзна працуе. У прыватнасці, кампанія “КБ Радар”, якая з’яўляецца на сённяшні момант заканадаўцам мод у гэтым кірунку (знаходзіцца пад заходнімі санкцыямі. — “Позірк”.) , таксама вельмі шырока і маштабна прадставіла сваю прадукцыю, якая выклікала, дарэчы, непадробную цікавасць нашых партнёраў“, — паведаміў Пантус.
Таксама кіраўнік ДВПК адзначыў, што на выставе была прадстаўленая ўся лінейка сродкаў радыёэлектроннай барацьбы (РЭБ), якую на сённяшні дзень вырабляе Беларусь. “Вялікая ўвага надавалася ў тым ліку так званаму акопнаму РЭБу спецыяльна для абароны кожнага байца, асобных сродкаў рухомасці і стацыянарных сродкаў для абароны інфраструктуры і аб’ектаў сацыяльнага прызначэння“, — сказаў ён.
Старшыня ДВПК асобна спыніўся на супрацоўніцтве ў галіне авіябудавання з Расіяй, згадаўшы сумесную працу па праекце “Асвей“ па распрацоўцы 19-мясцовага самалёта і арганізацыі яго серыйнай вытворчасці на базе 558-га авіяцыйнага рамонтнага завода ў Баранавічах.
Паводле яго слоў, сумесна з Росабаронэкспартам і Аб’яднанай авіябудаўнічымі карпарацыяй Расіі прапрацоўваецца таксама праект стварэння сумеснага самалёта Су-75 Checkmate — малапрыкметнага шматфункцыянальнага знішчальніка пятага пакалення.
