Лукашэнка даручыў вырасціць столькі бульбы, каб хапіла і Расіі
28 траўня, Позірк. Дапамагчы Расіі з бульбай даручыў 28 траўня Аляксандр Лукашэнка, прымаючы з дакладам старшыню Брэсцкага аблвыканкама Пятра Пархомчыка.
“Вельмі шмат размоў. Асабліва пасля нарады ў прэзідэнта Расіі, дзе ён там пажартаваў наконт бульбы, — цытуе спікера яго прэс-служба. — Але для нас гэта вельмі сур’ёзнае пытанне. У якім плане? Што-што, але бульбу мы вырошчваць умеем. Трэба вырасціць столькі, каб хапіла нам і Расіі”.
“Трэба дапамагчы братам-расіянам. І потым, гэта ж не дабрачыннасць. Гэта і прыстойныя грошы, прыстойныя цэны”, — дадаў ён.
Такое ж даручэнне Лукашэнка даў і па іншай гародніне: “Буракі, капуста, морква і цыбуля. Вынік — стабілізацыйныя фонды. Сёння думай пра тое, дзе будзеш захоўваць з запасам усю гэтую садавінагародніную прадукцыю”.
Кажучы пра вынікі працы Брэсцкай вобласці ў сельскагаспадарчым сектары, палітык адзначыў, што там “амаль няма падзяжу жывёлы”.
“Падзёж маецца, але скарацілі да ўзроўню мінулага года”, — праінфармаваў Пархомчык.
Лукашэнка ў адказ папярэдзіў, што сёлета “будзе вельмі жорсткая размова наконт падзяжу жывёлы”. “Вось, Віцебскую вобласць мы правяралі: ветурачы замест таго, каб лячыць, вельмі інтэнсіўна займаліся тым, як схаваць гэты падзёж”, — сказаў ён.
“Таму тут будзе размова вельмі сур’ёзная і прынцыповая. Таму што захавай мы ўсё пагалоўе, мелі б і добры вынік”, — падкрэсліў спікер.
Дэфіцыт бульбы ў Беларусі звязаны з неўраджаем 2024 года, а не з яго пастаўкамі ў Расію, заявіў парталу news.ru выканаўчы дырэктар Саюза ўдзельнікаў рынку бульбы і агародніны (РФ) Аляксей Красільнікаў. Паводле яго слоў, летась “сезон выдаўся не зусім удалым для многіх рэгіёнаў”.
Тэма беларускай бульбы ў расійскай інфармацыйнай прасторы ўзнікла дзякуючы прэзідэнту РФ Уладзіміру Пуціну, які 26 траўня на сустрэчы з прадпрымальнікамі здзівіўся, калі яму паведамілі пра дэфіцыт гэтай агародніны ў Беларусі.
“Беларусь — буйны вытворца, але сваю прадукцыю мець таксама важна”, — заявіў Пуцін, маючы на ўвазе магчымасць закупак бульбы ў Беларусі.
На гэта намеснік кіраўніка яго адміністрацыі Максім Арэшкін адказаў, што бульба ў Беларусі “скончылася”.
“Як скончылася? — запытаў прэзідэнт РФ. — Максім кажа, бульба ў Беларусі скончылася. Што гэта такое?”
У гэты ж дзень Лукашэнка і Пуцін стэлефанаваліся. Яго змест расійскі лідар раскрыў 27 траўня: “Бульбы ж не хапае ў нас, як выявілася. Размаўляў з Аляксандрам Рыгоравічам Лукашэнкам. Ён кажа: “У нас ужо ўсё прадалі ў Расію”.
27 траўня ўрад Беларусі скасаваў забарону на ўвоз бульбы з дзяржаў Еўрасаюза ды іншых “недружалюбных краін”. Пры гэтым было заяўлена, што рашэнне з’яўляецца “адказам на чарговыя санкцыі ЕС”.
8 траўня дэфіцыт бульбы прызнаў Лукашэнку, прапанаваўшы беларусам “адпакутаваць” без гэтага прадукта яшчэ месяц.
Пра недахоп у крамах бульбы і некаторай іншай агародніны (цыбулі, капусты і г.д.) ужо некалькі тыдняў рэгулярна паведамляюць СМІ і жыхары Беларусі ў сацсетках.
12 снежня 2024 года было ўведзенае трохмесячнае ліцэнзаванне вывазу бульбы. Рашэнне распаўсюджвалася на гэтую гародніну “незалежна ад краіны яе паходжання”. Заяўлялася, што рашэнне было прынятае на аснове “ацэнкі суадносін свабодных рэсурсаў гэтай прадукцыі” і “патрэбы краіны ў ёй на момант узгаднення ліцэнзіі”.
25 сакавіка ліцэнзаванне падоўжылі яшчэ на тры месяцы. Адзначалася, што прынятая мера “дазволіць забяспечыць кантроль над запасамі, а таксама за экспартнымі патокамі бульбы ў сувязі з ростам попыту і высокім коштам на яго па-за межамі Рэспублікі Беларусь”.
Згодна з рашэннем урада, вываз бульбы за мяжу ажыццяўляецца на падставе разавых ліцэнзій, што выдаюцца Міністэрствам антыманапольнага рэгулявання і гандлю на ўзгадненне з Міністэрствам сельскай гаспадаркі і харчавання, аблвыканкамамі і Мінскім гарвыканкамам.
Параўнанне даных Нацыянальнага статыстычнага камітэта сведчыць, што выкапаныя ў 2024 годзе 3,1 млн т бульбы — гэта на 22,5% менш, чым у 2023-м (4 млн).
Пагалоўе буйной рагатай жывёлы (БРЖ: каровы, быкі ды інш.) па выніках студзеня — сакавіка 2025 года склала 4 млн 12 тыс. 241 — на 2,1% менш у параўнанні з аналагічным перыядам 2024-га (4 млн 97 тыс. 254), вынікае з праведзенага “Позіркам” аналізу даных Нацыянальнага статыстычнага камітэта. Падзенне зафіксаванае ва ўсіх рэгіёнах. Горшая дынаміка ў Магілёўскай вобласці — 480.971 (508.760; -5,5%).
За 2024 год падзёж буйной рагатай жывёлы ў цэлым па краіне павялічыўся на 19,1% (са 124,2 тыс. да 147,9 тыс. галоў). У Брэсцкай вобласці — на 6,5% (з 23 тыс. да 24,5 тыс.), Віцебскай — на 12% (з 13,2 тыс. да 14,8 тыс.), Гомельскай — на 22,3% (з 25,7 тыс. да 31,4 тыс.), Гродзенскай — на 11,9% (з 14,8 тыс. да 16,5 тыс.), Мінскай — на 22,6% (з 28,4 тыс. да 34,9 тыс.), Магілёўскай — на 35,4% (з 19 тыс. да 25,7 тыс.).