3 чэрвеня, Позірк. Праца двух прыватных гандлёвых аб’ектаў у Магілёве прыпыненая за “найгрубейшыя парушэнні заканадаўства”, паведаміла 3 чэрвеня прэс-служба Камітэта дзяржаўнага кантролю.
Ведамства не называе гэтыя аб’екты.
Падчас праверкі, адзначае КДК, было выяўлена, што “ў продажы знаходзіліся больш за 3 тыс. найменняў нехарчовых тавараў (адзенне, абутак) без надання пакупнікам усёй неабходнай інфармацыі пра тавары (пра вытворцу, памер вырабу, склад сыравіны ды інш.) і без наяўнасці цэннікаў”.
Акрамя таго, гандлёвыя аб’екты, як сцвярджаецца, прадавалі больш за 1,8 тыс. найменняў тавараў — абутку і куртак — без сродкаў ідэнтыфікацыі на іх або на ўпакоўцы.
“На асобныя тавары ва ўладальнікаў гандлёвых аб’ектаў не было дакументаў, якія пацвярджаюць іх набыццё, якасць і бяспеку”, — гаворыцца ў паведамленні.
Работа гандлёвых аб’ектаў прыпыненая “да поўнага выпраўлення выяўленых парушэнняў і недахопаў”.
