Праз падзёж 116 жывёл у дачыненні да работніцы фермы ў Віцебскай вобласці ўзбуджаная крымінальная справа

3 чэрвеня, Позірк. Праз падзёж буйной рагатай жывёлы пракуратура Полацкага раёна (Віцебская вобласць) узбудзіла ў дачыненні да работніцы фермы — брыгадзіра вытворчай брыгады аднаго з аграрных прадпрыемстваў крымінальную справу паводле ч. 1 арт. 428 КК (службовая халатнасць), паведамляе прэс-служба Генеральнай пракуратуры.

Згодна з матэрыяламі справы, на малочнатаварнай ферме загінула 116 кароў і быкоў, прадпрыемству нанесеная шкода — больш за 46 тыс. рублёў.

Сцвярджаецца, што “брыгадзір як службовая асоба ў перыяд са жніўня 2024 года па красавік 2025 года, дакладна ведаючы пра факты падзяжу буйной рагатай жывёлы на ферме прадпрыемства, не арганізавала працу падначаленых і іншых работнікаў па высвятленні прычын гібелі жывёл”.

Акрамя таго, работніца фермы, паводле сцвярджэння ведамства, “не зрабіла захады да выпраўлення парушэнняў правіл утрымання і кармлення жывёл, прадухілення вірусных і бактэрыяльных захворванняў”, “выканання іншых мерапрыемстваў у рамках тэхналогіі вырошчвання і ўтрымання жывёлы”.

Крымінальнай адказнасцю за падзёж жывёлы прыгразіў 29 траўня Аляксандр Лукашэнка на першым пасяджэнні ўрада новага складу. Ён канстатаваў, што падзёж жывёлы “дасягнуў гістарычнага максімуму”.

Палітык прапанаваў вырашыць праблему падзяжу цялят пераводам іх у іншыя гаспадаркі.

Пагалоўе буйной рагатай жывёлы на канец красавіка 2025 года склала 3 млн 989 тыс. 212 — на 2,3% менш у параўнанні з аналагічнай датай 2024-га (4 млн 82 тыс. 584), вынікае з праведзенага “Позіркам” аналізу даных Нацыянальнага статыстычнага камітэта.

За 2024 год падзёж буйной рагатай жывёлы ў цэлым па краіне павялічыўся на 19,1% (з 124,2 тыс. да 147,9 тыс. галоў). У Брэсцкай вобласці — на 6,5% (з 23 тыс. да 24,5 тыс.), Віцебскай — на 12% (з 13,2 тыс. да 14,8 тыс.), Гомельскай — на 22,3% (з 25,7 тыс. да 31,4 тыс.), Гродзенскай — на 11,9% (з 14,8 тыс. да 16,5 тыс.), Мінскай — на 22,6% (з 28,4 тыс. да 34,9 тыс.), Магілёўскай — на 35,4% (з 19 тыс. да 25,7 тыс.).

28 траўня Лукашэнка, прымаючы з дакладам старшыню Брэсцкага аблвыканкама Пятра Пархомчыка, анансаваў “вельмі жорсткую размову наконт падзяжу жывёлы”.

У сакавіку 2019 года палітык зладзіў “кадравую чыстку” падчас наведвання аграхолдынгу “Купалаўскі” ў Магілёўскай вобласці. Умовы ўтрымання жывёлы ён параўнаў з Асвенцымам — нацысцкім лагерам смерці на тэрыторыі Польшчы ў гады Другой сусветнай вайны. “Яна ж уся абасраная”, — сказаў Лукашэнка, гледзячы на ​​адну з кароў.