Маскоўскі патрыярх Кірыл, які падтрымлівае вайну супраць Украіны, правядзе ў Беларусі два набажэнствы

4 чэрвеня, Позірк. Два набажэнствы правядзе ў Беларусі патрыярх Маскоўскі і ўсяе Русі Кірыл, які прыбыў у Мінск 4 чэрвеня, паведамляецца на партале Рускай Праваслаўнай Царквы.

Гаворка пра службы ў Свята-Духаўскім кафедральным саборы ў Мінску і Крыжа-Узвіжанскім саборы Спаса-Еўфрасіннеўскага жаночага манастыра ў Полацку (Віцебская вобласць).

Адзначаецца, у аэрапорце Мінск Кірыла сустракалі патрыяршы экзарх усяе Беларусі, мітрапаліт Мінскі і Заслаўскі Веніямін, амбасадар РФ Барыс Грызлоў, намеснік прэм’ер-міністра Наталля Пяткевіч і інш.

Візіт Кірыла ў Беларусь Грызлоў і Веніямін абмеркавалі на сустрэчы 28 траўня. Паведамлялася, што прадстаяцель РПЦ прыме ўдзел у святкаванні 900-годдзя з дня заснавання Спаса-Еўфрасіннеўскага жаночага манастыра.

Таксама абмяркоўвалася “асноватворная роля праваслаўя як адзінага духоўнага пачатку, які аб’ядноўвае расіян і беларусаў”. Быў падкрэслены “прыярытэтны характар сістэмнай работы па абароне традыцыйных каштоўнасцяў, выхаванні патрыятызму, фарміраванні ў маладога пакалення трывалых маральных асноў асабістага і грамадскага жыцця”.

Патрыярх Маскоўскі і ўсяе Русі Кірыл неаднаразова наведваў Беларусь з афіцыйнымі візітамі. Апошні раз ён быў у краіне ў чэрвені 2022 года-удзельнічаў ва ўрачыстасцях, прысвечаных 1030-годдзю праваслаўя на беларускіх землях і ўстанове Полацкай епархіі.

Некаторыя ініцыятывы Беларускай Праваслаўнай Царквы наўпрост падтрымліваюць “рускі мір” і расійскую вайсковую агрэсію ва Украіне. Напрыклад, Свята-Елісавецінскі манастыр арганізуе канцэрты ў падтрымку Расійскай арміі і збірае харчы і сродкі для расійскіх вайскоўцаў.

Публічна манастыр паведамляе пра “гуманітарную дапамогу” жыхарам Данбаса.

Праваслаўе дамінуе сярод канфесій у Беларусі.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Патрыярх Кірыіл неаднаразова дапускаў ухвальныя выказванні ў бок узброенай агрэсіі. РПЦ у РФ штодня моліцца аб“перамозе”.

З пачатку восені 2020 года па 28 красавіка 2025-га, Паводле дадзеных ініцыятывы “Хрысціянская візія“, з рэпрэсіямі ў Беларусі ў той ці іншай форме сутыкнулася 89 хрысціянскіх служыцеляў: рымска-каталіцкага касцёла — 34, евангельскіх цэркваў — 30, праваслаўнай царквы — 20, Грэка-каталіцкай царквы — пяць.