РФ і Украіна зноў абмяняліся палоннымі з выкарыстаннем тэрыторыі Беларусі
10 чэрвеня, Позірк. Расія і Украіна здзейснілі чарговы абмен палоннымі, паведаміў 10 чэрвеня ў сваім тэлеграм-канале ўкраінскі прэзідэнт Уладзімір Зяленскі.
Паводле яго слоў, Украіне вернутыя параненыя і цяжка хворыя вайскоўцы. “Усе яны маюць патрэбу ў неадкладнай медыцынскай дапамозе. Гэта важны гуманітарны акт. Абмены павінны працягвацца. Мы робім усё, каб знайсці і вярнуць кожнага і кожнага, хто ў палоне. Удзячны ўсім, хто дапамагае”, — падкрэсліў Зяленскі.
Абмен арганізаваны ў адпаведнасці з дамоўленасцямі, дасягнутымі бакамі 2 чэрвеня на перамовах у Стамбуле, удакладняе Каардынацыйны штаб па абыходжанні з ваеннапалоннымі Украіны.
Падкрэсліваецца, што сярод вызваленых ёсць абаронцы Марыўпаля, якія правялі ў няволі больш за тры гады. Акрамя прадстаўнікоў салдацкага і сяржанцкага складу, з палону вернутыя афіцэры. Усе былыя ваеннапалонныя маюць цяжкія раненні і хваробы. “Ампутаваныя канечнасці, праблемы са зрокам, абсцэсы, інфекцыі, траўмы, аскепкавыя раненні і хранічныя хваробы. У часткі вызваленых дыягнаставаны гепатыт і сухоты”, — гаворыцца ў паведамленні.
Заяўляецца, што з меркаванняў бяспекі дакладная колькасць вызваленых будзе паведамлена “пасля завяршэння працэсу абмену”.
Расійскі бок таксама не паведамляе пра колькасць вернутых вайскоўцаў.
“У цяперашні час расійскія вайскоўцы знаходзяцца на тэрыторыі Рэспублікі Беларусь, дзе ім надаецца неабходная псіхалагічная і медыцынская дапамога”, — адзначае Мінабароны РФ.
Паводле звестак “Радыё Свабада”, сярод тых, каго Украіна перадала Расіі, — грамадзянін Беларусі, жыхар Бабруйска (Магілёўская вобласць) Яўген Камянькоў. У ліпені 2022 года ён быў аб’яўлены ў Беларусі ў вышук пасля таго, як з 13-гадовым падлеткам збег з брэсцкага манастыра “Афанасія” ў Расію.
Пра пачатак чэрвеньскага абмену палоннымі паміж РФ і Украінай стала вядома напярэдадні. З выкарыстаннем беларускай тэрыторыі 9 чэрвеня былі вызваленыя вайскоўцы РФ і Украіны маладзей за 25 гадоў.
У траўні Расія і Украіна правялі з выкарыстаннем беларускай тэрыторыі найбуйнейшы ад пачатку вайны абмен палоннымі — 1.000 на 1.000. Пра гэты абмен бакі дамовіліся 16 траўня ў час перамоў у Стамбуле.
Раней у 2025 годзе адбылося пяць абменаў палоннымі.
Абмен на тэрыторыі Беларусі адбыўся 6 траўня. Тады кожны бок вярнуў па 205 чалавек. 19 красавіка кожны бок перадаў другому па 246 чалавек (дадаткова Украіне быў перададзены 31 паранены вайсковец у абмен на 15 расіян, якія мелі патрэбу ў тэрміновай медыцынскай дапамозе), 19 сакавіка — па 175 (у дадатак Украіна атрымала 22 цяжкапараненых), 5 лютага — па 150.
У 2024 годзе паміж краінамі афіцыйна было праведзена 12 абменаў.
