Дзякуючы КДБ выкрытая сістэматычная недаплата падаткаў рыэлтарскімі кампаніямі — МПЗ

12 чэрвеня, Позірк. Дзякуючы дзеянням праваахоўных органаў, “у першую чаргу КДБ“, былі выкрытыя “сур’ёзныя і сістэматычныя дзеянні“ з боку рыэлтарскіх кампаній, якія “недаплачвалі плацяжы ў бюджэт, хавалі падаткаабкладаемы базу, хавалі выручку”, заявіў намеснік міністра па падатках і зборах Уладзімір Муквіч 12 чэрвеня на прэс-канферэнцыі ў Мінску.

Цяпер, паводле яго слоў, міністэрствам “шэраг праверак ужо прызначаны”: “Ужо вядуцца тры праверкі. Думаю, яшчэ па шэрагу кампаній будзе таксама прынята рашэнне аб правядзенні праверак”.

“Шэраг плацельшчыкаў“, падкрэсліў чыноўнік, “добраахвотна пайшоў на ліквідацыю правапарушэнняў“, “але заўсёды знойдуцца тыя, хто думае, што дзяржаўныя органы не змогуць даказаць іх супрацьпраўнасць”.

Таксама Муквіч закрануў парушэнні ў іншых сферах эканомікі. Сёлета, адзначыў спікер, у поле зроку падатковых органаў трапіла каля 1,8 тыс. суб’ектаў гаспадарання, занятых у перавозках таксі: “Ёсць падставы казаць аб тым, што яны ўхіляюцца ад выканання падатковага заканадаўства па выплаце плацяжоў у бюджэт. Шмат гэта ці мала? У рэестры [перавозчыкаў таксі] сёння каля 5 тыс. суб’ектаў гаспадарання. Мы мяркуем, што сума, ад якой плацельшчыкі ўхіліліся, складае больш за 100 млн рублёў“.

Складзена 79 актаў камеральных праверак, на падставе якіх да выплаты прад’яўлена 17 млн рублёў, праведзена 764 адміністрацыйных працэсы па гэтым напрамку, дадаў прадстаўнік ведамства. Сума ўтоенай выручкі, паводле яго слоў, склала 2,8 млн рублёў, арыштавана 38 аўтамабіляў.

У сферы надання медыцынскіх паслуг “устаноўлены факты ўтойвання выручкі на суму 10 млн рублёў”, сцвярджае Муквіч.

У сферы гульнявога бізнесу з пачатку 2025 года падаткавікамі выяўлена больш за 30 правапарушэнняў, “вінаватыя прыцягнутыя да адміністрацыйнай адказнасці“: “Тры факты мы разгледзелі як органы ліцэнзійнага кантролю. Адзін суб’ект гаспадарання быў пазбаўлены ліцэнзіі з-за нявыплаты плацяжоў у бюджэт“.

9 красавіка інтэрнэт-рэсурс Tochka.by, якія працуе ў краіне, са спасылкай на свае крыніцы паведаміў, што ў Беларусі адбыліся масавыя ператрусы ў агенцтвах нерухомасці — былі затрыманні, у тым ліку кіраўнікоў.

12 траўня Аляксандр Лукашэнка падпісаў закон “Аб рыэлтарскай дзейнасці”, ён быў афіцыйна апублікаваны праз тры дні. Дакумент скасаваў інстытут агентаў па аперацыях з нерухомасцю.