Пасля скаргі ва ўрад у маладзечанскай краме знялі з продажу 27 відаў тавару

15 чэрвеня, Позірк. 27 найменняў тавараў са скончаным тэрмінам прыдатнасці знята з продажу ў краме “Марцін” у Маладзечне (Мінская вобласць), паведамляе прэс-служба Міністэрства антыманапольнага рэгулявання і гандлю (МАРГ).

Агульная сума тавараў складае 450 рублёў, гаворыцца ў паведамленні, гаворка аб малочнай, кулінарнай, мясной прадукцыі, а таксама аб кандытарскіх вырабах.

“Таксама ўстаноўлены факты невыканання абавязковага пераліку тавараў, указанні недакладных звестак на цэнніках альбо зусім іх адсутнасць і г.д. Праводзіцца аналіз выканання заканадаўства аб цэнаўтварэнні”, — адзначае Марг.

Падкрэсліваецца, што супрацоўнікі ведамства правялі праверку ў згаданай краме “з улікам звароту спажыўца, які паступіў на адрас урада Беларусі”.

МАРГ рэгулярна падвяргае праверкам аб’екты рознічнага гандлю, як правіла, выяўляючы ў іх дзейнасці парушэнні заканадаўства.

15 траўня паведамлялася, што падчас выбарачнай праверкі гандлёвай сеткі “Санта” Міністэрствам антыманапольнага рэгулявання і гандлю парушэнні ўстаноўленыя ў 76% аб’ектаў, у кожнай трэцяй краме прадаваліся тавары са скончанымі тэрмінамі прыдатнасці. Кантралёры наведалі 34 гандлёвыя аб’екты ў 18 населеных пунктах.

У той жа дзень МАРГ таксама справаздачыўся аб кантрольна-аналітычных мерапрыемствах у дачыненні да 44 суб’ектаў гандлю на рынках. Парушэнні былі ўстаноўленыя ў 32, або амаль 75% аб’ектаў, ахопленых маніторынгам.

4 красавіка паведамлялася, што ва ўсіх правераных крамах рознічнай сеткі “7 пятніц” (належыць ТАА “Юністар груп”) выяўленыя парушэнні заканадаўства аб гандлі і абароне правоў спажыўцоў.

10 сакавіка МАРГ паведаміў, што парушэнні правілаў гандлю ўстаноўленыя амаль у кожнай трэцяй праверанай краме сеткі “Табакерка”, якая належыць СЗАТ “Энэрга-Оіл”.

28 лютага МАРГ інфармаваў аб парушэннях правілаў гандлю, устаноўленых ва ўсіх правераных крамах сеткі ” Хіт!”, якая належыць ТАА “Еўрагандаль”.

20 лютага ведамства ўказала на парушэнні ў 96% гандлёвых аб’ектаў рознічнай сеткі “Капеечка”.

Раней МАРГ прад’явіў маштабныя прэтэнзіі да інтэрнэт-пляцоўкі “Вайлдбэрыз” і гандлёвай сеткі “Суседзі”.