Сейм Літвы разгледзіць папраўкі пра нацыянальныя санкцыі супраць Беларусі і РФ у тэрміновым парадку

17 чэрвеня, Позірк. Дэпутаты Сейма Літвы 16 чэрвеня адобрылі ў першым чытанні папраўкі, якія прадугледжваюць магчымасць выкарыстоўваць нацыянальныя эканамічныя санкцыі ў дачыненні да грамадзян і кампаній з Беларусі і Расіі, паведамляе партал навін Delfi.

Папраўкі, прапанаваныя ў якасці свайго роду страхоўкі на выпадак непадаўжэння санкцый на ўзроўні Еўрасаюза, падтрымалі 123 літоўскія парламентарыі, супраць выказаліся двое, адзін устрымаўся.

Сейм таксама дамовіўся разгледзець адпаведны законапраект у тэрміновым парадку. Чакаецца, што 18 чэрвеня адбудзецца абмеркаванне ў парламенцкім Камітэце па замежных справах, а 19-га “прапанова вернецца ў залу пленарных пасяджэнняў”.

“Нам варта прадугледзець альтэрнатыўныя шляхі [санкцыйнага ўздзеяння на Беларусь і РФ], — заявіў кіраўнік МЗС Кястуціс Будрыс, прадстаўляючы законапраект у парламенце. — Ці спатрэбяцца яны нам? Гэта пакажа бліжэйшая будучыня, гэта пакажа Савет па замежных справах [ЕС]. <…> Улетку будзе шмат падзей, наступяць тэрміны, калі давядзецца прымаць рашэнні [па далейшым дзеянні санкцый супраць Мінска і Масквы]”.

Папраўкі, прапанаваныя знешнепалітычным ведамствам, прадугледжваюць магчымасць для ўрада складаць спісы асоб і кампаній, якія трапляюць пад санкцыі, замарожваць іх актывы або прымяняць сектаральныя абмежаванні.

Выключэнне з гэтых абмежаванняў будзе выкарыстоўвацца ў выпадках, калі сродкі неабходныя для аплаты прадуктаў харчавання, камунальных паслуг, арэнды, лекаў, лячэння, падаткаў і страхоўкі, а таксама пры ўзнікненні праблем са здароўем.

Прымяненне сектаральных санкцый скіраванае на забарону імпарту тэхналогій, паслуг і праграмнага забеспячэння з Беларусі і РФ, а таксама аказання паслуг, звязаных з пастаўкай або вытворчасцю гэтых тавараў.

МЗС прапануе прадугледзець дадатковыя сектаральныя і абмежавальныя меры ў выпадку, калі будзе высветлена, што адпаведны сектар эканомікі РФ і Беларусі можа быць выкарыстаны для падтрымкі ваеннай агрэсіі супраць Украіны, удасканалення арміі і тэхналогій, нарошчвання прамысловага патэнцыялу або нанясення шкоды бяспецы і незалежнасці Літвы, у тым ліку шляхам маніпулявання інфармацыяй.

Чакаецца, што папраўкі, якія прадугледжваюць магчымасць увядзення нацыянальных эканамічных санкцый, набудуць моц 1 жніўня, але гэта мае ухваліць Сейм.

14 красавіка прэм’ер-міністр Літвы Гінтаўтас Палуцкас заявіў, што калі ў дачыненні да Беларусі і РФ “больш не будзе еўрапейскіх сектаральных санкцый”, то абмежавальныя меры могуць быць нацыянальнымі, яны павінны быць прынятыя хаця б на рэгіянальным узроўні.

Ён прызнаў, што ў выпадку непадаўжэння еўрапейскіх санкцый дамагчыся такога ж эфекту з дапамогай нацыянальных сектаральных санкцый будзе складана. “Нам трэба падрыхтавацца, нам трэба пралічыць, нам трэба ўзважыць, калі такой дамоўленасці не будзе — гэта будзе вельмі нядобра”, — заявіў Палуцкас, падкрэсліўшы, што нацыянальныя абмежавальныя меры не могуць кампенсаваць еўрапейскія.

Калі ўлады Латвіі, Эстоніі, Польшчы, Фінляндыі адмовяцца ўводзіць нацыянальныя санкцыі, то Літва, прыняўшы такія рашэнні асобна, не дасягне ніякіх мэт, а шкода будзе адчувальнай, дадаў кіраўнік літоўскага ўрада.

11 красавіка прэзідэнт Літвы Гітанас Наўседа заявіў, што прымяненне санкцый асобнымі дзяржавамі “аказвае на агрэсара значна меншае ўздзеянне”. Наўседа выступіў за тое, каб санкцыі ЕС не проста падаўжаліся: “Мы павінны гаварыць і дзейнічаць”.

Цяпер Еўрасаюз разглядае магчымасць увядзення 18-га пакета санкцый супраць Расіі за ваенную агрэсію супраць Украіны. Прадугледжваецца, што ў яго могуць быць уключаныя беларускія прадпрыемствы.

17 красавіка Сейм Літвы падоўжыў на чарговы год санкцыі для грамадзян Беларусі і Расіі.