Прадстаўніца рэжыму Лукашэнкі, які абвінавачваецца ў міграцыйным крызісе, паскардзілася ў ААН на палітыку суседзяў з ЕС
21 чэрвеня, Позірк. З крытыкай міграцыйнай палітыкі суседніх краін Еўрапейскага саюза выступіла пастаянны прадстаўнік Беларусі пры аддзяленні ААН ды іншых міжнародных арганізацыях у Жэневе Ларыса Бельская 20 чэрвеня падчас інтэрактыўнага дыялогу са спецдакладчыкам па правах мігрантаў Гехадам Мадзі.
“Вітаем і дзякуем спадару Мадзі за даследаванне і даклад. Падзяляем многія ацэнкі і высновы спецыяльнага дакладчыка, — цытуе дыпламата прэс-служба беларускага знешнепалітычнага ведамства. — Нерэгулярная міграцыя спалучаная з рызыкамі, якія пагаршаюцца неабгрунтаванай мілітарызацыяй межаў і наўмысным адыходам ад міжнародных стандартаў надання прытулку. Беларусь сутыкаецца з наступствамі такой палітыкі для мігрантаў на межах з Літвой, Латвіяй, Польшчай”.
Паводле слоў Бельскай, у Беларусі “рэгулярна фіксуюцца ахвяры жорсткага “пушбэка”, якія маюць патрэбу ў медыцынскай ды іншай дапамозе”. Мігранты праз “жорсткае абыходжанне” становяцца “ахвярамі прадухільных смерцяў”. “За апошнія 4 гады задакументавана больш за 80 выпадкаў гібелі мігрантаў, выціснутых на тэрыторыю Беларусі, больш за 15 сёлета”, — заявіла пастаянны прадстаўнік Мінска пры рэгіянальным аддзяленні ААН.
“Следчыя органы расследуюць факты гвалту і парушэнні правоў мігрантаў, якія накіроўваліся транзітам у Еўрасаюз. Сведчанні пацярпелых сведчаць, што ў сумежных дзяржавах сфармаваныя фільтрацыйныя пункты, дзе затрыманых асоб збівалі, адбіралі грошы і тэлефоны, а потым выштурхоўвалі на нашу тэрыторыю”, — сцвярджае Бельская.
Дыпламат заклікала спецдакладчыка “трымаць у фокусе ўвагі і належным чынам рэагаваць на выпадкі гібелі людзей на межах ЕС і садзейнічаць спыненню злоўжыванняў і парушэнняў правоў чалавека мігрантаў”.
Беларусь, паводле яе слоў, зацікаўленая ў супрацы з профільным спецдакладчыкам і гатовая да “прагматычнага дыялога з сумежнымі краінамі, у тым ліку для сумесных расследаванняў выпадкаў гібелі і знікненняў”.
“Разлічваем, што нашы суседзі адыдуць ад канфрантацыі, праявяць здаровы сэнс і палітычную волю да аднаўлення даверу і супрацы ў сферы сумеснага кіравання межамі”, — заявіла Бельская.
Беларускія ўлады рэгулярна паведамляюць пра пакуты, фізічныя траўмы і гібель замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі. Пры гэтым беларускі бок не паведамляе, як мігранты трапляюць на межы з краінамі ЕС у зоне адказнасці пагранічнага ведамства.
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, таму што іх туды нібыта паклікалі.
