ЕС асудзіў дапамогу, якую Беларусь надае расійскай агрэсіі, новыя санкцыі не прынятыя

27 чэрвеня, Позірк. Савет ЕС рашуча асудзіў “падтрымку трэціх краін, а таксама іх суб’ектаў і арганізацый, якія дазваляюць Расіі працягваць сваю агрэсіўную вайну супраць Украіны“, гаворыцца ў заяве, апублікаванай 26 чэрвеня і падтрыманай 26 з 27 членаў Еўрапейскага саюза ў Бруселі.

Рада “асуджае працяг ваеннай падтрымкі, што надаецца Іранам, Беларуссю і КНДР“, і “настойліва заклікае ўсе краіны неадкладна спыніць любую прамую або ўскосную дапамогу Расіі ў яе агрэсіўнай вайне супраць Украіны“.

Савет ЕС “падкрэслівае важнасць намаганняў па наданні гуманітарнай дапамогі і прыняцці мер па ўмацаванні даверу, у прыватнасці, абмену ваеннапалоннымі, вызваленні грамадзянскіх асоб і вяртанні ўсіх выкрадзеных украінскіх дзяцей і іншых грамадзянскіх асоб, незаконна дэпартаваных і перавезеных у Расію і Беларусь“.

18-ы пакет санкцый ЕС супраць Расіі, які ў ліку іншага прадугледжваў узмацненне санкцыйнага ціску ў дачыненні да Беларусі быў на дадзеным этапе адхілены ў сувязі з пярэчаннямі Славакіі.

У 17-ы — апошні прыняты на дадзены момант — пакет санкцый ЕС у дачыненні да Расіі быў уключаны Мінскі завод колавых цягачоў. У 16-ы пакет, прыняцце якога было прымеркавана да трэцяй гадавіны расійскай вайсковай агрэсіі ва Украіне, трапіла беларускае ААТ “Інтэграл“. У папярэднія пакеты санкцый уносіліся іншыя беларускія прадпрыемствы і асобы, якія тым ці іншым чынам садзейнічаюць расійскай агрэсіі, што пачалася 24 лютага 2022 года пры падтрымцы Мінска.

Прэм’ер-міністар Польшчы Дональд Туск на прэс-канфэрэнцыі 26 чэрвеня паведаміў, што Еўрасаюз працягнуў дзейныя санкцыі, прынятыя ў сувязі з расійскай агрэсіяй ва Украіне.

Беларусь таксама згадваецца ў прынятым усімі членамі ЕС 26 чэрвеня выніковым дакуменце ў раздзеле “Еўрапейская абарона і бяспека”. Падкрэсліваецца, што “абарона ўсіх сухапутных, паветраных і марскіх межаў ЕС спрыяе бяспецы Еўропы ў цэлым, асабліва ўсходняй мяжы ЕС, улічваючы пагрозы, якія зыходзяць ад Расіі і Беларусі”.