У Мінскай вобласці аўтамабіль збіў лася і ўрэзаўся ў дрэва — два чалавекі загінула, яшчэ тры ў бальніцы

6 ліпеня, Позірк. Два чалавекі загінула, яшчэ тры апынулася ў бальніцы ў выніку аўтамабільнай аварыі, якая адбылася ўначы 6 ліпеня, паведамляе прэс-служба Міністэрства ўнутраных спраў.

Згодна са звесткамі ведамства, трагедыя адбылася на 23-м кіламетры трасы Р-23 (Мінск — Мікашэвічы). У адпаведнасці з мапай аўтамабільных дарог, гэта непадалёк ад аграгарадка Возера ва Уздзенскім раёне.

“Паводле папярэдняй інфармацыі, 33-гадовы кіроўца Belgee здзейсніў наезд на дзікую жывёлу (лася), — гаворыцца ў паведамленні. — Пасля чаго аўтамабіль з’ехаў у правы па ходзе руху кювет, дзе ўрэзаўся ў дрэва. У выніку сутыкнення двое пасажыраў (33 і 71 год) загінулі, яшчэ тры чалавекі шпіталізаваныя”.

Адзначаецца, што на месцы здарэння працавалі супрацоўнікі Дзяржаўтаінспекцыі, Міністэрства па надзвычайных сітуацыях, медыкі і следча-аператыўная група.

МУС нагадала, што кіроўцам, “асабліва ў цёмны час сутак”, варта быць вельмі пільнымі “на дарогах, дзе могуць з’явіцца дзікія жывёлы”, і выбіраць хуткасць, якая “дазволіць спыніцца пры раптоўным узнікненні перашкоды”.