На IV канферэнцыі “Новая Беларусь” абмяркуюць вынікі “пяці гадоў барацьбы”, рэгіянальную бяспеку

8 ліпеня, Позірк. Папярэдняя праграма IV канферэнцыі “Новая Беларусь”, якая пройдзе 9–10 жніўня ў Варшаве, апублікаваная на сайце дэмакратычнага лідара Святланы Ціханоўскай.

На першы дзень форума запланавана тры панэлі: “Грамадзянскі пульс: дзе мы апынуліся за 5 гадоў”, “Пяць гадоў барацьбы: вынікі без ілюзій”, “Рэгіянальная бяспека: Беларусь 2027”. У гэты ж дзень, як чакаецца, пройдзе Марш салідарнасці.

Другі дзень пабудаваны ў фармаце працы ў тэматычных групах з ліку ўдзельнікаў канферэнцыі, прэзентацыі адпаведных вынікаў. 10 жніўня таксама пройдзе сесія пытанняў і адказаў Ціханоўскай ды іншых прадстаўнікоў Аб’яднанага пераходнага кабінета (АПК).

На першай канферэнцыі “Новая Беларусь”, якая адбылася ў 2022 годзе ў Вільнюсе, Ціханоўская абвясціла пра стварэнне АПК, прызначыла яго прадстаўнікоў.

На другім форуме ў 2023 годзе ў Варшаве палітык зрабіла пэўныя кадравыя змены ў АПК, прадэкларавала імкненне дэмсіл дамагчыся ўступлення Беларусі ў Еўрасаюз.

Падчас трэцяй канферэнцыі летась у Вільнюсе сярод іншага была падпісаная “Платформа 2025” — сумесная стратэгія дзеянняў дэмсіл на гэты год.