Рыжанкоў разам з іншымі міністрамі замежных спраў краін ШАС абмеркаваў з Сі Цзіньпінам развіццё арганізацыі

15 ліпеня, Позірк. Цяперашні стан і перспектывы развіцця Шанхайскай арганізацыі супрацоўніцтва (ШАС) абмеркавалі 15 ліпеня са старшынёй КНР Сі Цзіньпінам міністры замежных спраў краін ШАС, у тым ліку кіраўнік беларускага знешнепалітычнага ведамства Максім Рыжанкоў.

Паводле інфармацыі МЗС Беларусі, бакі абмяняліся думкамі па гэтым пытанні ў святле саміту ШАС, які пройдзе сёлета ў верасні ў Цяньцзіні.

“Старшыня КНР праінфармаваў пра прыярытэты кітайскага старшынства ў ШАС, а таксама даў ацэнку актуальнай міжнароднай абстаноўцы”, — гаворыцца ў паведамленні.

Візіт Рыжанкова ў Кітай распачаўся 15 ліпеня.

Міністр абароны Віктар Хрэнін удзельнічаў у нарадзе кіраўнікоў ваенных ведамстваў краін ШАС, якая прайшла напрыканцы чэрвеня ў Кітаі.

Мінск стаў паўнапраўным членам ШАС 4 ліпеня 2024 года. Апрача Беларусі і Кітая ў арганізацыю ўваходзяць Індыя, Іран, Казахстан, Кыргызстан, Пакістан, Расія, Таджыкістан і Узбекістан.

У сярэдзіне траўня беларускія вайсковыя медыкі ўдзельнічалі ў семінары па ваеннай медыцыне для дзяржаў — членаў ШАС, які прайшоў у кітайскім Сіяне.

Аляксандр Лукашэнка наведваў Кітай 2–4 чэрвеня. У рамках візіту адбыліся яго перагаворы са старшынёй КНР Сі Цзіньпінам. На трэці дзень пасля вяртання, 7 чэрвеня, палітык адкрыў у Мінску нацыянальны футбольны стадыён, пабудаваны, паводле сцвярджэння Лукашэнкі, за кошт Кітая ў якасці “падарунку”.

Тыднем пазней Беларусь наведаў намеснік старшыні пастаяннага камітэта 14-га Усекітайскага сходу народных прадстаўнікоў Чжан Цінвэй. У рамках візіту адбылася яго сустрэча з Лукашэнкам.