На польска-літоўскай мяжы вынятыя кантрабандныя беларускія цыгарэты

18 ліпеня, Позірк. Амаль 83 тыс. пачкаў кантрабандных беларускіх цыгарэт знайшлі супрацоўнікі польскай мытна-падатковай службы пры праверцы на мяжы Польшчы і Літвы, паведаміла 18 ліпеня Палата падатковага адміністравання Беластока.

Кантрабанду схавалі ў аўтафургоне польскай кур’ерскай кампаніі, за стырном якога быў 30-гадовы грамадзянін Украіны. У адпаведнасці з рашэннем суда кіроўца ўзяты пад варту на тры месяцы, яму пагражае да 10 гадоў зняволення. Пракуратура распачала расследаванне.

Паводле ацэнкі ведамства, кошт кантрабанднага грузу — больш за 1,4 млн злотых (звыш 380 тыс. долараў паводле актуальнага курсу Нацбанка Польшчы).

20 чэрвеня ў Нідзіцкім павеце (паўночна-ўсходняя частка Польшчы) паліцыя знайшла 190 тыс. беларускіх цыгарэт (9,5 тыс. пачкаў) у спыненым для праверкі легкавым аўтамабілі “Таёта”. Ацэнкавы кошт — больш за 166 тыс. злотых (44,6 тыс. долараў).

19 чэрвеня паведамлялася, што ў Сувалках, непадалёк ад мяжы Польшчы з Беларуссю і Літвой, спыненая кантрабанда 10 тон сушанага курыльнага тытуню без польскіх акцызных марак. Вытворца не называўся; кошт канфіскаванага тавару ацанілі прыкладна ў 9 млн злотых (больш за 2,4 млн долараў). За стырном транспартнага сродку, які перавозіў нелегальны тавар, быў грамадзянін Беларусі.