Кітай выдзеліць Беларусі 2 млн долараў на ахову лясоў ад пажараў

23 ліпеня, Позірк. Фонд глабальнага развіцця і супрацоўніцтва “Поўдзень-Поўдзень” (Кітай) выдзеліць Беларусі 2 млн долараў на ахову лясоў ад пажараў, паведамляе прэс-служба Міністэрства лясной гаспадаркі.

Сродкі паступяць у рамках праекта “Ахова лясоў Беларусі: комплексная ініцыятыва па забеспячэнні гатоўнасці да прадухілення і рэагавання на пажары на мясцовым узроўні”.

Адзначаецца, што гэта вынік сумеснай працы Мінлясгаса з Праграмай развіцця ААН у Беларусі і амбасадай КНР. Сродкі будуць накіраваныя на ўмацаванне матэрыяльна-тэхнічнай базы лясгасаў.

“Гэта першы праект у лясной галіне, які мы рэалізуем за кошт сродкаў кітайскіх партнёраў. <…> Праблема аховы лясоў ад пажараў з кожным годам становіцца ўсё больш актуальнай”, — заявіў міністр лясной гаспадаркі Аляксандр Кулік.

Паводле яго слоў, штогод лясгасы ўкладаюць “велізарныя сілы і сродкі” ў тэхнічнае перааснашчэнне. У прыватнасці, за “апошні час” закуплена больш за 170 новых пажарных аўтамабіляў, а таксама іншыя інвентар і тэхніка.

“Важным крокам у справе забеспячэння аховы лясоў ад пажараў стала ўкараненне аўтаматызаванай сістэмы маніторынгу і ранняга выяўлення лясных пажараў. З гонарам магу сказаць, што Беларусь стала першай краінай у Еўропе, якая на 100% пакрыла свае лясы аўтаматычным відэаназіраннем. Дзякуючы гэтаму нам удалося істотна павысіць аператыўнасць выяўлення ачагоў, а, такім чынам, і рэагавання на іх. Усе папярэднія гады мы фіксавалі істотнае зніжэнне сярэднегадавой плошчы аднаго ўзгарання і павелічэнне працэнта выяўлення пажараў з дапамогай гэтай сістэмы”, — сказаў міністр.

Пры гэтым, паводле слоў чыноўніка, на 23 ліпеня плошча патушаных лясных пажараў у Беларусі перавысіла 1,2 тыс. га., іх агульная колькасць — звыш 600.

Амбасадар Кітая ў Беларусі Чжан Вэньчуань адзначыў, што фонд “Поўдзень-Поўдзень” створаны, каб “дапамагчы блізкім сябрам у дасягненні мэтаў устойлівага развіцця”.

Згаданы праект быў ухвалены пастановай Савета міністраў № 263 ад 15 траўня 2025 года як праект міжнароднай тэхнічнай дапамогі. Адметна, што крыніца фінансавання і яго аб’ём у дакуменце не пазначаныя.

Беларусь на працягу апошніх 10–15 гадоў атрымлівала сістэматычнае фінансаванне ў рамках праектаў з Еўрапейскім саюзам па лініі абароны лясоў і падтрымкі службы выратавання.

У рамках праекта ЕС “Польшча-Беларусь-Украіна” (2018–2021), мэтай якога было стварэнне сумеснай сістэмы хуткага рэагавання на надзвычайныя сітуацыі, у Беларусь былі пастаўленыя пажарныя і выратавальныя аўтамабілі, прайшло навучанне персаналу. Бюджэт праекта склаў каля 4 млн еўра (90% фінансавання).

З 2019 па 2020 год рэалізоўваўся праект “Экахім” з акцэнтам на аварыйную экалагічную і хімічную бяспеку, які ўключаў мадэрнізацыю пажарна‑выратавальнага абсталявання і сумесныя вучэнні службаў Беларусі і Польшчы. Агульны бюджэт — больш за 2 млн еўра.

Супрацоўніцтва ЕС з Мінскам у выглядзе міжнароднай тэхнічнай дапамогі было прыпынена амаль па ўсіх напрамках у сувязі з рэпрэсіямі пасля прэзідэнцкіх выбараў 2020 года і ўдзелам краіны ў расійскай агрэсіі супраць Украіны.