Літоўскі дэпутат-кансерватар просіць пазбавіць офіс Ціханоўскай акрэдытацыі ў краіне

23 ліпеня, Позірк. З просьбай адмяніць акрэдытацыю, выдадзеную 5 ліпеня 2021 года “Прадстаўніцтву беларускай дэмакратыі” (дэ-факта Офісу Святланы Ціханоўскай), выступіў дэпутат Сейма Літвы Вітаўтас Сініца.

Адпаведны зварот парламентарыя апублікаваны 22 ліпеня на сайце Сейма, ён адрасаваны міністру замежных спраў Кястуцісу Будрысу.

У дакуменце Сініца сцвярджае, што “літоўскай гасціннасцю і добрай воляй” дэмсілы карыстаюцца “не для наладжвання добрасуседскіх адносін, а для стварэння ў Літве нейкай базы для беларусаў” і “альтэрнатыўнай Беларусі”.

Ціханоўская абвінавачваецца ў тым, што яна нібыта “не здолела рашуча асудзіць тэорыю літвінізму, якая распаўсюджваецца ў шэрагах беларускай апазіцыі”, а таксама “не раз дазваляла сабе выказванні па пытаннях унутранай палітыкі Літвы, напрыклад, крытыкуючы намеры абмежаваць іміграцыю з Беларусі, матываваныя меркаваннямі нацыянальнай бяспекі”.

На думку Сініцы, “асабліва шкодная публічная дзейнасць мужа Святланы Ціханоўскай, аднаго з лідараў беларускай апазіцыі Сяргея Ціханоўскага”. “Гэты дзеяч, які пражывае ў Літве, раней праславіўся сваім ухваленнем незаконнай анэксіі Крыма Расіяй, а апошнім часам стаў казаць пра планы стварыць у Літве нешта накшталт аўтаномнага беларускага раёна. Падобныя публічныя заявы варта расцэньваць як замах на тэрытарыяльную цэласнасць і дзяржаўны лад Літвы, і яны павінны быць рашуча асуджаныя”, — заяўляе дэпутат.

23 ліпеня на сайце Ціханоўскай была апублікаваная заява яе Офіса ў сувязі з ініцыятывай Сініцы.

Беларуская дэмакратычная супольнасць “шануе падтрымку Літвы, літоўскага ўрада і народа” і ўдзячная Вільнюсу за “шматгадовую падтрымку беларусаў, якія змагаюцца за мірныя дэмакратычныя і еўрапейскія пераўтварэнні ў краіне”, гаворыцца ў каментарыі.

Адзначаецца, што “ліст дэпутата літоўскага Сейма, які з’явіўся ў публічнай прасторы, утрымлівае недакладную і ілжывую інфармацыю і шкодзіць сяброўскім адносінам паміж літоўскім і беларускім народамі”.

Падкрэсліваецца, што задачай згаданага “Прадстаўніцтва беларускай дэмакратыі” (“Baltarusi dem demokratijos atstovybei”) з’яўляецца “ўмацаванне літоўска-беларускіх адносін”, яно “спрыяе ўзаемадзеянню і лепшай каардынацыі з інстытутамі літоўскай улады”.

“Ні офіс Святланы Ціханоўскай, ні “Baltarusi dem demokratijos atstovybei” не атрымліваюць ніякай непасрэднай фінансавай дапамогі ад Літвы, а супрацоўнікі гэтых інстытутаў не карыстаюцца ніякімі льготамі або выгадамі ў Літве”, — гаворыцца ў заяве.

Таксама адзначаецца, што Ціханоўская і дэмакратычныя сілы “паслядоўна асуджаюць любыя праявы так званага літвінізму, спробы пасеяць варожасць паміж літоўцамі і беларусамі”. Звяртаецца ўвага, што раней палітык выступіла з шэрагам заяў, у якіх асудзіла “літвінізм”, а ў 2025 годзе прапанавала дэпутатам Сейма праект сумеснага пагаднення “Аб садзейнічанні ўзаемаразуменню паміж літоўцамі і беларусамі ў пытаннях гістарычнай спадчыны і ідэнтычнасці дзеля будучыні і свабоды літоўскага і беларускага народаў”.

“Раней Дэпартамент дзяржаўнай бяспекі Літвы заяўляў, што пад выглядам “літвінізму” робіцца спроба дыскрэдытаваць дэмакратычныя сілы Беларусі і супрацьпаставіць грамадзян Літвы і беларусаў, якія жывуць у краіне”, — падкрэслівае Офіс Ціханоўскай.

“Сяргей Ціханоўскі, вызвалены і дэпартаваны ў Літву рэжымам Лукашэнкі пасля 5 гадоў незаконнага зняволення, у першы дзень пасля вызвалення публічна і адназначна асудзіў расійскую агрэсію, акупацыю Крыма, падтрымаў Украіну. Таксама Сяргей Ціханоўскі растлумачыў свае словы пра “астраўкі” беларусаў, якія не маюць намеру ствараць ніякіх аўтаномных акругаў, і патлумачыў, што меў на ўвазе ўмацаванне дыяспаральных суполак беларусаў за мяжой, праз стварэнне бізнес- і культурных хабаў, у тым ліку як гэта рабіла літоўская дыяспара падчас савецкай акупацыі”, — адзначаецца ў заяве.

Офіс звяртае ўвагу, што Ціханоўская і дэмсілы “заўсёды адзначаюць асаблівую ролю Літвы ў падтрымцы дэмакратычных перамен у Беларусі і інстытуцыйнага прадстаўніцтва беларускай дэмакратычнай супольнасці”. “Мы цэнім і ўдзячныя за гэтае супрацоўніцтва. Літва, якая сама праходзіла праз досвед акупацыі, ведае, наколькі ў гэтай барацьбе важная дапамога вольнага свету”, — заяўляе каманда Ціханоўскай.

“Мы імкнемся да вяртання на радзіму, каб пабудаваць свабодную, дэмакратычную, еўрапейскую Беларусь, якая будзе прадказальным, мірным і бяспечным сябрам для сваіх суседзяў”, — гаворыцца ў дакуменце.

Сініца з’яўляецца заснавальнікам і лідарам літоўскай нацыяналістычнай кансерватыўнай партыі “Нацыянальнае аб’яднанне”. Абраны ў Сейм па аднамандатнай акрузе і з’яўляецца адзіным дэпутатам ад згаданай партыі.