У Грузіі заведзеная крымінальная справа за абразу паліцэйскім беларускага праваабаронцы Кісляка

29 ліпеня, Позірк. Па факце абразы паліцэйскім у Тбілісі беларускага праваабаронцы Рамана Кісляка ўзбуджаная крымінальная справа, пра што пацярпеламу паведамілі 28 ліпеня ў офісе пракурора грузінскай сталіцы.

“Справа адбывалася 22 траўня, — паведаміў Кісляк “Позірку”. — Я быў на адным з судовых працэсаў па адмове беларусам [у наданні прытулку], адначасна ў горадзе праходзілі палітычныя працэсы. Будынак быў перакрыты, былі дэманстранты, сотні паліцэйскіх”.

Паводле  слоў праваабаронцы, ён не браў удзелу ў акцыях пратэсту, але “з цікаўнасці” рабіў фатаграфіі і здымаў на відэакамеру.

“Калі [міма] праходзіла група паліцэйскіх, адзін з іх сказаў па-руску: “Не здымай”. А затым павярнуўся і дадаў: “Ідзі ў ж***у”, — адзначыў Кісляк.

Пасля гэтага беларус патэлефанаваў па адзіным нумары экстранных службаў 112 і паведаміў аб тым, што адбылося, аднак “ніхто не прыехаў”. “Вакол жа сотні паліцэйскіх, яны занятыя іншымі справамі”, – дадаў ён.

Паводле слоў праваабаронцы, па нумары 112 ён тэлефанаваў некалькі разоў, затым “стаў у пікет”, пасля чаго да яго падышлі паліцэйскія і сказалі: “Сёння да вас не прыедуць, але абавязкова выклічуць”.

Інфармацыя пра інцыдэнт, згодна звестак суразмоўцы, спачатку трапіла ў інспекцыю МУС, якая “займаецца некарэктнымі паводзінамі супрацоўнікаў”, а затым — у пракуратуру.

У КК Грузіі абраза з боку паліцэйскага лічыцца перавышэннем паўнамоцтваў.

“Лічу пазітыўным фактам, што пачалі вытворчасць і [мяне] дапыталі. Выклікалі перакладчыка. Тым больш, калі б я сказаў нейкаму паліцэйскаму нешта такое, мяне б, напэўна, пасадзілі на 60 сутак, бо ў іх [у Грузіі] цяпер ёсць больш жорсткі артыкул [Кодэкса аб адміністрацыйных правапарушэннях] аб абразе паліцэйскіх (было да 15 сутак арышту. — “Позірк”.)”, — сказаў праваабаронца.

Ён адзначыў, што не настойвае на крымінальным пакаранні паліцэйскага, але хоча, каб “супрацоўніка знайшлі і прыцягнулі да дысцыплінарнай адказнасці”. “Нейкі пазітыў у такіх зваротах ёсць, паліцыянты пачынаюць сябе паводзіць больш ветліва”, — лічыць Кісляк.

У ліпені 2025 года праваабаронца беспаспяхова завяршыў у Грузіі праходжанне ўсіх унутраных працэдур абскарджання адмовы ў прытулак. У яго скончыўся тэрмін дзеяння беларускага пашпарта (яго немагчыма замяніць за мяжой пасля забароннага ўказа Аляксандра Лукашэнкі ад 4 верасня 2023 года), на працягу 30 дзён Кісляк павінен пакінуць Грузію.

Іншыя падрабязнасці даступныя падпісчыкам “Позірк+“

Гл. таксама па тэме:

У першай палове 2025 года Грузія адмовіла ў прытулку 16 беларусам, у тым ліку тром непаўналетнім