Міліцыя шукае тых, хто распаўсюдзіў “недакладную інфармацыю” пра затрыманні каля месца падзення дрона

29 ліпеня, Позірк. Мінская міліцыя заявіла пра распаўсюд “недакладнай інфармацыі” пра затрыманні мінчукоў супрацоўнікамі АМАПу на месцы падзення беспілотнага лятальнага апарата.

У яе прэс-рэлізе звесткі называюцца “фэйкам”: “Абстаноўка ў Мінску застаецца спакойнай і кантралюемай. Супрацоўнікамі міліцыі праводзяцца аператыўна-вышуковыя мерапрыемствы для ўстанаўлення асобаў, што распаўсюджваюць недакладную інфармацыю”.

Міліцыя папярэдзіла, што за “распаўсюд заведама ілжывай інфармацыі прадугледжана крымінальная адказнасць”.

Раней праваабарончы цэнтр “Вясна” са спасылкай на ўласныя крыніцы паведамляў, што супрацоўнікі АМАП затрымліваюць жыхароў сталіцы каля месца падзення беспілотніка каля дома № 72 па вуліцы Матусевіча ў Фрунзенскім раёне Мінска.

Паводле інфармацыі праваабаронцаў, на месцы здарэння знаходзіцца вялікая колькасць сілавікоў, якія, верагодна, шукаюць тых, хто перадаваў інфармацыю пра інцыдент у незалежныя медыя.

Пра інцыдэнт са спасылкай на відавочцаў паведаміў партал “Зеркало”. Было заяўлена, што каля 2:00 ночы 29 ліпеня дрон урэзаўся ў дом, упаў на прыпаркаваны аўтамабіль і выбухнуў. Медыя заявіла, што мае відэазапіс крушэння беспілотніка.

Прыкладна праз гадзіну пасля з’яўлення навіны ў СМІ Міністэрства абароны Беларусі пацвердзіла факт падзення дрона.

“Дзяжурнымі сіламі СПА каля 2 гадзін ночы 29 ліпеня ў паветранай прасторы Рэспублікі Беларусь быў выяўлены і спынены палёт неапазнанай паветранай цэлі — парушальніка парадку выкарыстання паветранай прасторы, які быў ідэнтыфікаваны як БПЛА, — гаварылася ў паведамленні ваеннага ведамства. — У выніку ўздзеяння сродкаў радыёэлектроннай барацьбы ў 02:33 БПЛА ўпаў у раёне дома 72 па вул. Матусевіча г. Мінска”.

Адзначалася, што пацярпелых няма; праводзіцца праверка. У сувязі са здарэннем “аператыўна прымаюцца дадатковыя меры для ўзмацнення кантролю за выкарыстаннем паветранай прасторы”.

“Кіраўнік дзяржавы трымае сітуацыю на асабістым кантролі”, — заявіла Мінабароны.

У кастрычніку 2024 года супрацоўнікі Камітэта дзяржаўнай бяспекі затрымалі жыхарку Калінкавічаў (Гомельская вобласць) за супрацоўніцтва з “экстрэмісцкімі рэсурсамі”, якое заключалася ў перадачы “інфармацыі, фота- і відэаматэрыялаў адміністратарам дэструктыўных тэлеграм-каналаў”.

Як вынікае з апублікаванага відэа, сілавікі ўварваліся ў дом, з якога напярэдадні было знятае відэа падзення паблізу беспілотнага лятальнага апарата.

Пры гэтым, паводле інфармацыі рэгіянальнага медыя “Флагшток”, відэа не перадавалася “дэструктыўным” рэсурсам, а было апублікавана ў мясцовым чаце дарожнай дапамогі “Калінкавічы, Аўта, ДАІ”. Пазней відэаролік апублікавалі незалежныя СМІ.

На відэа чуваць гук рухавіка, верагодна, падаючага дрона, і пасля бачная яркая ўспышка, чуваць гук выбуху, пасля чаго на вуліцы знікае святло.

Паведамлялася, што ўначы на 3 кастрычніка на тэрыторыю Беларусі чарговы раз заляцеў расійскі БПЛА, па непацверджанай інфармацыі — дрон іранскай вытворчасці “Shahed”, які мог упасці ў Калінкавічах.

Беларускія ўлады інцыдэнт ніяк не каментавалі. Не было згадкі пра яго і ў паведамленні пра затрыманне жыхаркі Калінкавічаў.