На апошніх у ліпені таргах долар патаннеў амаль на тры капейкі, яго курс зноў меншы за 3 рублі

31 ліпеня, Позірк. Амерыканская, агульная еўрапейская, а таксама кітайская валюты патаннелі на таргах Беларускай валютна-фондавай біржы 31 ліпеня 2025 года.

Курс долара знізіўся да 2,9934 рубля (-0,98%; -0,0296). На таргах 29 ліпеня гэтая валюта падаражэла з 2,955 да 3,0198 рубля (+2,19%; +0,0648), упершыню з траўня перасягнуўшы трохрублёвую адзнаку.

Еўра патаннеў да 3,4616 (-0,98%; -0,0344), юань — да 4,1066 рубля за 10 (-2%, -0,0839).

Расійскі рубель падаражэў да 3,6868 за 100 (+0,53%; +0,0194).

На мінулым працоўным тыдні (21–25 ліпеня) долар падаражэў на 0,41% (з 2,935 да 2,9473 рубля), еўра — на 1,29% (з 3,416 да 3,46), юань — на 0,87% (з 4,0705 да 4,1); расійскі рубель патаннеў на 0,87% (з 3,7354 да 3,703 за 100).

Афіцыйны курс долара ў Беларусі за студзень — чэрвень 2025 года знізіўся на 14,60% (з 3,4735 да 2,9663 рубля) — гэта другое месца на тэрыторыі былога СССР, сведчыць праведзены “Позіркам” параўнальны аналіз каціровак цэнтрабанкаў на 31 снежня 2024 года і 30 чэрвеня 2025-га (па выніках студзеня, студзеня — лютага, студзеня — сакавіка, студзеня — красавіка і студзеня — траўня таксама другое месца, -1,73%, -8,54%, -10,25%, -12,16%, -13,7% адпаведна).

У 2024 годзе афіцыйны курс долара ў Беларусі вырас на 9,32% (з 3,1775 да 3,4735 рублі).