Лукашэнка хоча “абараніць” рынак Саюзнай дзяржавы ад тавараў з трэціх краін
31 ліпеня, Позірк. Незадаволенасць тым, што на расійскі рынак “трапляюць тавары з трэціх краін без усялякай лакалізацыі”, выціскаючы беларускую прадукцыю, выказаў Аляксандр Лукашэнка 31 ліпеня на нарадзе з кіраўнікамі беларускіх дыпламатычных прадстаўніцтваў.
Палітык, словы якога прыводзіць яго прэс-служба, заявіў, што ў 2022–2024 гадах Беларусь пераарыентавала на расійскі рынак “істотныя аб’ёмы паставак, нарасціла вытворчасць і продажы там, дзе гэта было патрэбна расіянам”. У РФ, адзначыў ён, “сышоў асноўны прырост экспарту за тры гады — плюс 10 млрд долараў”. Пры гэтым Лукашэнка не назваў прычыну такога развароту, які стаў неабходнасцю пасля ўвядзення заходніх санкцый у дачыненні да Мінска за падтрымку Масквы ў поўнамаштабнай вайне, якую яна развязала супраць Украіны ў 2022 годзе.
Разам з тым, падкрэсліў спікер, цяпер сітуацыя на расійскім рынку памянялася: “Ён перанасычаны, а канкурэнцыя пастрожваецца”. “Напрыклад, са студзеня па травень гэтага года экспарт тавараў у Расію прасеў на 320 мільёнаў долараў па прадукцыі машынабудавання (легкавыя машыны, трактары, камбайны)”, — канстатаваў ён.
Прыярытэтнымі задачамі Лукашэнка назваў “абарону саюзнага рынку ад тавараў з трэціх краін; развіццё новых для Беларусі сегментаў эканомікі, уключаючы авія- і суднабудаванне, атамную энергетыку і касмічную прамысловасць; развіццё мультыбрэндавых і сэрвісных цэнтраў, беларускіх гандлёвых дамоў у рэгіёнах Расіі”.
На яго думку, важным з’яўляецца запуск адзінай прамысловай палітыкі, якая “пакуль толькі на паперы”, з допускам да конкурсаў па продажы тэхнікі і каардынацыяй у дублюючых вытворчасцях.
Лукашэнка сцвярджае, што расіяне гатовыя фінансаваць многія праекты, плаціць грошы, у першую чаргу за тыя праекты, якія патрэбныя РФ.
Каментуючы 15 чэрвеня 2023 года падзенне продажаў беларускіх грузавікоў на расійскім рынку, першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці спецыяльных ахоўных мер праз актыўную экспансію кітайскіх вытворцаў”.
2 красавіка 1996 года першы прэзідэнт РФ Барыс Ельцын і Аляксандр Лукашэнка падпісалі дагавор аб стварэнні супольнасці Беларусі і Расіі, а 2 красавіка 1997-га — дагавор аб Саюзе Беларусі і Расіі. 23 траўня 1997 года быў прыняты статут саюза. 8 снежня 1999 года падпісаны дагавор аб стварэнні Саюзнай дзяржавы, які набыў моц 26 студзеня 2000 года.
Расія пачала фарсіраваць тэму інтэграцыі з Беларуссю ў снежні 2018 года. Дзмітрый Мядзведзеў, які на той момант займаў пасаду прэм’ер-міністра РФ, фактычна ўвязаў максімальнае збліжэнне дзвюх краін з далейшай падтрымкай Мінска з боку Масквы.
Беларусь не мае нікогда бліжэй за Расію, але мае інтарэсы і на Захадзе, заяўляе Лукашэнка
31 ліпеня, Позірк. Нягледзячы на блізкія стасункі з Расіяй, Беларусі нельга забываць і пра заходнія краіны, такое меркаванне Аляксандр Лукашэнка выказаў 31 ліпеня на нарадзе з кіраўнікамі беларускіх дыпламатычных прадстаўніцтваў. "Вы павінны, прынамсі, пакуль я прэзідэнт, запомніць аксіёму: бліжэй, чым …
