Праваабаронцы прызналі палітвязнямі яшчэ восем чалавек

7 жніўня, Позірк. Беларуская праваабарончая супольнасць прызнала палітвязнямі яшчэ восем чалавек, вынікае з сумеснай заявы, апублікаванай у тым ліку цэнтрам “Вясна”.

Адпаведным статусам надзеленыя Анастасія Гарчакова і Анастасія Сікірская, асуджаныя на 2 гады пазбаўлення волі паводле арт. 361¹ Крымінальнага кодэкса (стварэнне экстрэмісцкага фарміравання або ўдзеле ў ім).

Таксама палітвязням прызнаны Павел Аляксееў, прыгавораны да 5 гадоў пазбаўлення волі паводле арт. 361¹ і арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы) КК.

У спіс уключаныя ўзятыя пад варту Рычард Логвінаў, Валянцін Нікішын, Кацярына Дзяруга, Ян Пацюпа — усе абвінавачваюцца паводле арт. 361⁴ КК (садзейнічанне экстрэмісцкай дзейнасці) і Аляксандр Здаравеннаў — артыкул невядомы.

Прадстаўнікі праваабарончай супольнасці запатрабавалі спыніць “пераслед правамерных формаў выказвання меркаванняў”, неадкладна вызваліць згаданых людзей і іншых палітвязняў, спыніць рэпрэсіі і прыняць меры, накіраваныя на “дэкрыміналізацыю дыфамацыйных правапарушэнняў і адмену артыкулаў Крымінальнага кодэкса, якія прадугледжваюць адказнасць за абразу дзяржавы, дзяржаўных сімвалаў і службовых асоб”, спыніць усе раней узбуджаныя паводое гэтых артыкулаў справы.

Акрамя “Вясны”, заяву падпісалі Lawtrend, Respect-Protect-Fulfill, Human Constanta, Беларускі ПЭН і “Прававая ініцыятыва”.

На дадзены момант праваабаронцы прызнаюць палітвязнямі 1.191 чалавека.