Аднагадовае дзіця загінула ў Мінску, выпаўшы з акна
10 жніўня, Позірк. Пра гібель 9 жніўня ў Мінску малалетняга дзіцяці паведамляе Следчы камітэт.
Паводле папярэдняй інфармацыі, хлопчык (1 год і 9 месяцаў) “знаходзіўся ў гасцях у сяброўкі маці, якая даручыла прыглядаць за ім сваёй 13-гадовай дачцэ”.
“У нейкі момант ён застаўся адзін у пакоі, узлез на падваконнік, адкрыў акно і ўпаў з вышыні пятага паверха. Ад атрыманых траўмаў дзіця памерла”, — гаворыцца ў паведамленні.
На месцы здарэння працавала следча-аператыўная група. “Падчас агляду ўстаноўлена, што вокны кватэры абсталяваныя ахоўнымі механізмамі ў выглядзе замка, аднак на момант здарэння яны знаходзіліся ў незачыненым стане”, — адзначае ведамства.
28 ліпеня паведамлялася пра падзенне з акна ў Баранавічах (Брэсцкая вобласць) 6-гадовага дзіцяці. “Малы выжыў, але атрымаў цяжкія траўмы”, — адзначаў Следчы камітэт.
16 ліпеня СК паведаміў аб трэцім выпадку падзення дзяцей з вокнаў за шэсць дзён. Інцыдэнты адбыліся ў Мінску, Магілёве і Магілёўскай вобласці, дзеці атрымалі розныя траўмы.
Паводле даных Генеральнай пракуратуры на 9 ліпеня, “за мінулы перыяд 2025 года” пры выпадзенні з вокнаў загінула шэсць дзяцей, тады як за аналагічную частку 2024-га — адно дзіця.
У першым квартале 2025 года ад знешніх прычын у Беларусі загінула 32 непаўналетніх, паведамляла ў траўні аб’яднанне BelPol са спасылкай на атрыманы службовы ліст намесніка генпракурора Аляксея Стука ў Міністэрства адукацыі, Міністэрства працы і сацыяльнай абароны і мясцовыя органы ўлады.
Адзначалася, што смяротнасць вырасла на 52,4%.
У 2024 годзе ў Беларусі ад знешніх прычын загінула 126 дзяцей — на 34% больш, чым у 2023-м (94).
