9 жніўня, Позірк. Распрацоўкай эканамічнай стратэгіі бяспекі і эканамічных рэформаў, а таксама абмеркаваннем іх падтрымкі з міжнароднымі партнёрамі зоймецца пасля ўступлення на пасаду кандыдат у прадстаўнікі Аб’яднанага пераходнага кабінета (АПК) па эканоміцы і фінансах Аліса Рыжычэнка.
“Я не збіраюся працаваць у адзіночку, гэта значыць будзе прыцягвацца экспертная супольнасць — як беларускія, так і міжнародныя эксперты з розных краін“, — адзначыла Рыжычэнка ў інтэрв’ю “Позірку“.
Паводле яе слоў, найперш неабходна пралічыць неабходныя рэсурсы для транзітнага перыяду. Для гэтага патрэбны поўны аўдыт беларускай эканомікі: што адбываецца з прадпрыемствамі, якія з іх маюць патрэбу ў дадатковых рэсурсах, якія трэба мадэрнізаваць, колькі рэсурсаў неабходна для забеспячэння энергетычнай бяспекі, хто можа дапамагчы з пастаўкамі і забяспечыць энергарэсурсамі ў выпадку канфрантацыі з Расіяй.
Кандыдатура Рыжычэнкі на пасаду прадстаўніка АПК па эканоміцы і фінансах была ўзгодненая 23 ліпеня.
Рыжычэнку рэкамендавалі на гэтую пасаду фракцыі Каардынацыйнай рады “Еўрапейскі выбар” і “Каманда Латушкі і “Рух За Свабоду”.
Рыжычэнка скончыла Беларускі дзяржаўны эканамічны ўніверсітэт. Магістр эканомікі, эксперт сферы дзяржаўнага кіравання і міжнароднага развіцця. Пражывае ў Вене (Аўстрыя). Рэгулярна выступае ў незалежных СМІ з каментарамі на эканамічную тэматыку.
Пасада прадстаўніка АПК па эканоміцы і фінансах вакантная з лістапада 2022 года.
