Віктар Бабарыка знаходзіцца ў атрадзе, працуе ў пякарні

Апублікавана на адкрытай версіі “Позірку” 16 жніўня 2025 года ў 12:15

16 жніўня, Позірк. Як стала вядома “Позірку”, асуджаны прэтэндэнт на пасаду прэзідэнта на выбарах-2020 Віктар Бабарыка знаходзіцца ў сваім атрадзе і зноў працуе ў пякарні.

Былы банкір, які пайшоў у палітыку пасля пачатку той выбарчай кампаніі, адбывае 14-гадовы тэрмін у папраўчай калоніі № 1 у Наваполацку (Віцебская вобласць).

У атрад Бабарыка быў вернуты з медсанчасткі, куды ў сваю чаргу трапіў з памяшкання камернага тыпу (ПКТ).

Прыгавор Бабарыку, якога праваабарончая супольнасць прызнала палітвязнем, вынес 6 ліпеня 2021 года Вярхоўны суд. Ён абвінаваціў прэтэндэнта на вышэйшую дзяржаўную пасаду ў “атрыманні хабару ў асабліва буйным памеры” (ч. 3 арт. 430 КК) і “легалізацыі сродкаў, атрыманых злачынным шляхам” (ч. 2 арт. 235). Палітык віну не прызнаў.

У пякарню яго вызначылі пасля этапавання ў наваполацкую калонію для адбыцця пакарання. Паведамлялася, што ён працаваў там апальшчыкам у 30-градусную спякоту і ўкладчыкам хлебабулачных вырабаў.

У красавіку 2023 года з’явілася інфармацыя аб шпіталізацыі Бабарыкі ў наваполацкую бальніцу са слядамі збіцця і пнеўматораксам. Крыніца “Позірку” паведамляла, што, “магчыма, у лёгкіх у яго выяўленая вада”.

У ліпені таго ж года адміністрацыя калоніі паведаміла сваякам Бабарыкі, што ён знаходзіцца ў памяшканні камернага тыпу, яго здароўю “нічога не пагражае”.

З лютага 2023 года Віктар Бабарыка ўтрымліваўся ў рэжыме інкамунікада (інфармацыйнай блакады), які праваабарончая супольнасць лічыць цяжкім парушэннем правоў чалавека.

У студзені 2025 года былы апазіцыйны актывіст Раман Пратасевіч, які пайшоў на здзелку з уладамі, размясціў у сябе фатаграфіі і відэазварот Бабарыкі да родных. З тых часоў пра яго зноў нічога не было вядома.

9 лістапада Віктару Бабарыка споўніцца 62 гады.

Пытанне вызвалення 1.300 чалавек абмяркоўвалі 15 жніўня па тэлефоне прэзідэнт ЗША Дональд Трамп і Аляксандр Лукашэнка.