Грамадзянка Францыі паспрабавала ўвезці ў Беларусь незадэклараванае золата і пазбавілася больш як 6 тыс. долараў

16 жніўня, Позірк. Грамадзянка Францыі паспрабавала ўвезці з Літвы ў Беларусь незадэклараваныя каштоўныя металы, паведаміла 16 жніўня прэс-служба Дзяржаўнага мытнага камітэта.

Паводле інфармацыі ведамства, замежніца перасякала пункт пропуску Каменны Лог на аўтобусе, які рухаўся па маршруце Вільнюс — Гомель. Пры праходжанні кантролю яна прайшла праз “зялёны калідор”, які азначае, што чалавеку няма чаго дэклараваць.

Аднак падчас праверкі яе багажу мытнікі знайшлі 50-грамовы злітак золата і 84 залатыя манеты “розных наміналаў і гадоў выпуску, вырабленыя ў Францыі, Італіі і Швейцарыі”. Як адзначаецца, агульная вага залатых вырабаў склала амаль 600 грамаў, кошт — 190 тыс. рублёў (каля 64 тыс. долараў паводле актуальнага курсу Нацбанка).

“Недэклараванне такой колькасці золата магло паслужыць падставай для нявыплаты мытных плацяжоў у памеры каля 50 тыс. рублёў”, — гаворыцца ў паведамленні.

Замежніца прыцягнутая да адказнасці паводле ч. 4 арт. 15.5 КаАП (недэклараванне або прадстаўленне недакладных звестак пра тавары — у буйным памеры). Адзначаецца, што яна заплаціла штраф у памеры 19 тыс. рублёў (6,4 тыс. долараў).